कोहलीने पराभवासाठी फलंदाजांना धरले जबाबदार

नवी दिल्ली: दक्षिण आफ्रिकेविरुद्धच्या तीन सामन्यांच्या कसोटी मालिकेतील दुसऱ्या सामन्यात १३५ धावांनी झालेल्या पराभवाबरोबरच भारताने मालिकाही गमावली आहे. हा पराभव टीम इंडियाचा कर्णधार विराट कोहलीच्या चांगलाच जिव्हारी लागला आहे. विराटने या पराभवाला फलंदाजांना जबाबदार धरले आहे. ढिसाळ क्षेत्ररक्षण हेही पराभवाचे एक कारण असल्याचे कोहली म्हणाला आहे.

आपल्याला फलंदाजांनी निराश केल्याचं कोहलीनं सामन्यानंतर बोलताना स्पष्ट केलं आहे. विकेट्सकडे पाहून आपल्याला आश्चर्य वाटल्याचंही तो म्हणाला. आपली टीम अपेक्षेप्रमाणे खेळली नाहीच यावरच कोहलीने भर दिला.

भारतीय फलंदाज कसे अपयशी ठरले याबाबत बोलताना कोहली म्हणाला की, सुरुवातीला मिळालेल्या सफलतांचा टीम इंडियाला फायदा उठवता आलेला नाही. आम्हाला चांगल्या भागीदाऱ्या रचताच आलेल्या नाहीत. पहिल्या पारीत आम्हाला आघाडी मिळवता यायला हवी होती. गोलंदाजांनी मात्र आपली कामगिरी चांगली बजावली. फलंदाजांनी मात्र अपेक्षेप्रमाणे खेळ केलेला नाही.

भारतानं मालिकाच गमावल्यामुळे आता माझ्या १५० धावांच्या खेळीचे काहीच महत्त्व राहिलेले नाही. आम्ही जर जिंकलो असतो तर ३० धावांचे महत्त्वही अधिक झाले असते अशा शब्दांत कोहलीने आपली नाराजी उघड केली.

आम्ही प्रयत्न नक्कीच केले, पण ते तितकेसे पुरेसे नव्हतेच. आम्ही क्षेत्ररक्षण करतानाही चुका केल्या. दक्षिण आफ्रिका संघानं मात्र या चुका केल्या नाहीत आणि म्हणूनच तो संघ विजेता ठरला आहे अशा शब्दात कोहलनीने टीम इंडियाच्या पराभवाचे विश्लेषण केलं आहे.