सावधान... पाकशी खेळणं सोपं नाही!- सचिन

मटा ऑनलाइन वृत्त । नवी दिल्ली

आशिया चषक स्पर्धेत पाकिस्तानचा संघ दुबळा वाटला असला, तरी भारत-पाक सामना कधीच सोपा नसतो. प्रत्येक खेळाडूवर अपेक्षांचं ओझं असतं, मानसिक दडपण असतं. त्यामुळे आपण पूर्ण तयारीनिशीच मैदानात उतरायला हवं, असा सल्ला मास्टर ब्लास्टर सचिन तेंडुलकरनं टीम इंडियाला दिला आहे.

धोनी आणि त्याचे शिलेदार ज्या दर्जाचं क्रिकेट खेळताहेत, ते पाहता भारत टी-२० वर्ल्ड कप जेतेपदाचा प्रबळ दावेदार असल्याचं मत सचिननं व्यक्त केलंय. इंग्लंड, ऑस्ट्रेलिया, द. आफ्रिका आणि टीम इंडिया हे चार संघ उपांत्य फेरीत पोहोचतील, असा त्याचा अंदाज असून आपण इंग्लंडपासून थोडं सांभाळून राहावं, अशी सूचना त्यानं केली आहे.

* पाक संघात संतुलन चांगलं!

बांगलादेशात पाकिस्तानची कामगिरी चांगली झाली नसली, तरी वर्ल्ड कपसाठी त्यांनी नक्कीच वेगळी रणनीती आखली असेल, वेगळा सराव केला असेल. पाक संघात मोहम्मद हाफिज, शाहीद आफ्रिदी, वहाब रियाझ, शोएब मलिक, मोहम्मद आमीर यासारखे दर्जेदार खेळाडू आहेत. संघात फलंदाजी-गोलंदाजीचं संतुलन खूप चांगलं आहे, फक्त आत्मविश्वास कमी आहे. पण, तो कधीही उंचावू शकतो. भारत-पाकमधील प्रत्येक सामना 'हाय प्रेशर' होत असल्यानं आपण तयार राहायला हवं, असं सचिननं नमूद केलं. गेल्या काही सामन्यांत आपण जसं खेळलोय, तसंच खेळत राहिलो, तर सगळेच संघ थोडे दबकून राहतील, अशी 'टिप'ही त्यानं दिली.

* धोनीच्या बॅटमधला 'तो' आवाज

जगातील सर्वोत्तम 'फिनिशर' मानल्या जाणाऱ्या धोनीला बऱ्याच काळापासून सूर गवसत नव्हता. पण, एशिया कपमधील सामन्यांमध्ये त्याच्या बॅटमधून जो आवाज ऐकला, त्यातून सकारात्मक मानसिकतेचे संकेत मिळत आहेत, असं सचिननं आवर्जून सांगितलं. दडपणाखाली निर्णय घेण्याची धोनीची क्षमता उल्लेखनीय असून तो आता परिपक्व कर्णधार झाल्याचं प्रमाणपत्रही त्यानं दिलं.

वर्ल्ड कपमध्ये युवराजसिंगचं फुटवर्क महत्त्वाचं ठरेल, तर नव्या दमाचा जसप्रीत बुमराह गेम चेंजर ठरू शकेल, असं सचिनला वाटतंय.