जाडेजा, पुजारा, विजय 'अ' श्रेणीत

मटा ऑनलाइन वृत्त । नवी दिल्ली

बीसीसीआयने खेळाडूंच्या वार्षिक कराराची घोषणा केली असून सध्या ऑस्ट्रेलियाविरुद्ध सुरू असलेल्या कसोटी मालिकेत अष्टपैलू कामगिरी बजावणाऱ्या तसेच आयसीसीच्या गोलंदाजी क्रमवारीत (कसोटी) अव्वल स्थानी झेप घेणाऱ्या रवीद्र जाडेजाला 'अ' श्रेणीत बढती देण्यात आली आहे. जाडेजासह भरवशाचा फलंदाज चेतेश्वर पुजारा आणि मुरली विजय यांनीही 'अ' श्रेणीत स्थान मिळवले आहे.

बीसीसीआयने 'अ' श्रेणीतील खेळाडूंच्या मानधनात दुप्पट वाढ केली आहे. या श्रेणीतील खेळाडूंना वार्षिक एक कोटी रुपये मानधन दिलं जात होतं त्याऐवजी आता २ कोटी रुपये दिले जाणार आहेत. 'ब' श्रेणीसाठी १ कोटी, 'क' श्रेणीसाठी ५० लाख ही रक्कम निश्चित करण्यात आली आहे. ३० सप्टेंबरपर्यंत या कराराची मुदत असणार आहे. १ ऑक्टोबर २०१६ पासून या कराराची अंमलबजावणी करण्यात येणार आहे. करारबद्ध करण्यात आलेल्या खेळाडूंना एका कसोटीसाठी १५ लाख, एका वन-डेसाठी ६ लाख आणि एका टी-२० सामन्यासाठी ३ लाख रुपये इतकं मानधन दिलं जाणार आहे.

रैनाला स्थान नाही!

विशेष म्हणजे सुरेश रैनाला ३२ खेळाडूंच्या या यादीत स्थान मिळू शकलेलं नाही. खरं तर १ ऑक्टोबर २०१६ नंतर सुरू झालेल्या मोसमात रैना आंतरराष्ट्रीय सामना खेळलेला आहे तरीही त्याला या यादीत स्थान दिले नसल्याने आश्चर्य व्यक्त होत आहे. याशिवाय हरभजन सिंग आणि गौतम गंभीर यांनाही करारबद्ध करण्यात आलेलं नाही.

'अ' श्रेणीतील खेळाडू:

विराट कोहली, महेंद्रसिंग धोनी, चेतेश्वर पुजारा, अजिंक्य रहाणे, रविचंद्रन अश्विन, रवींद्र जाडेजा, मुरली विजय.

'ब' श्रेणीतील खेळाडू:

युवराज सिंग, रोहित शर्मा, के. एल. राहुल, भुवनेश्वर कुमार, मोहम्मद शमी, इशांत शर्मा, उमेश यादव, वृद्धीमान साहा, जसप्रीत बुमराह

'क' श्रेणीतील खेळाडू:

शिखर धवन, अंबाती रायडू, अमित मिश्रा, मनीष पांडे, अक्षर पटेल, करुण नायर, हार्दिक पंड्या, आशीष नेहरा, केदार जाधव, यजुवेंद्र चहल, पार्थिव पटेल, जयंत यादव, मनदीप सिंग, धवल कुलकर्णी, शार्दुल ठाकूर, ऋषभ भट्ट.