आपलाच डाव आर्चरवर उलटला!

मुंबईः प्रसिद्ध लेखक जेफ्री आर्चर यांनी शुक्रवारी भारतीय प्रेक्षकांच्या अखिलाडूवृत्तीचा खोटा दाखला देत, त्यांची बदनामी करण्याचा प्रयत्न केला; पण त्यांच्या चुकीच्या दाखल्यामुळे हा ‘डाव’ त्यांच्यावरच उलटला. त्याचे झाले असे की, गुरुवारी पार पडलेल्या भारताविरुद्धच्या सामन्यात इंग्लंडच्या इयन मॉर्गनने शतक केले; पण त्याच्या या कामगिरीला भारतीय प्रेक्षकांनी दादच दिली नाही, असे आर्चरचे म्हणणे आहे. ‘आम्ही लॉर्डसवर शतक झळकावणाऱ्या सचिन, द्रविड, लक्ष्मण आणि शास्त्री या भारतीयांना उभे राहून दाद देतो; पण या भारतीयांनी मॉर्गनसाठी मात्र टाळ्या वाजवल्या नाही...’ असे ट्टिवट आर्चर यांनी केले. मात्र असे करताना आर्चर यांचा अभ्यास कमी पडला. सचिन तेंडुलकर व लक्ष्मण यांनी लॉर्डसवर शतकच केले नाही. हाच मुद्दा त्यांच्या ट्टिवटला प्रतिक्रिया देत ‘नेटकऱ्यांनी’ माडला.

तसेच हा सामना स्टेडियममध्ये बघण्यासाठी गेलेल्या प्रेक्षकांनीही आर्चर यांच्यावर टीका करताना, ‘आम्ही मॉर्गनसाठी उभे राहिले होतो; पण तुम्हाला आमची दाद दिसली नाही’ अशी प्रतिक्रिया दिली आहे. तसेच टीव्हीवर थेट प्रक्षेपण पाहणाऱ्यांनीही भारतीयांनी मॉर्गनच्या शतकी कामगिरीला दाद दिल्याचे म्हटले आहे.