झूलन जखमी; ऑस्ट्रेलियाविरुद्धच्या मालिकेतून बाहेर

ऑस्ट्रेलियाविरुद्धच्या मालिकेसाठी भारतीय संघ जाहीर

वृत्तसंस्था, नवी दिल्ली

वेगवान गोलंदाज झूलन गोस्वामी दुखापतीमुळे आगामी ऑस्ट्रेलियाविरुद्धच्या वनडे मालिकेला मुकली आहे. मंगळवारी तीन वनडे मालिकेसाठी मिताली राजच्या नेतृत्वाखालील भारतीय महिला संघाची निवड करण्यात आली.

भारतीय क्रिकेट नियामक मंडळाने (बीसीसीआय) दिलेल्या माहितीनुसार ही मालिका १२ ते १८ मार्चदरम्यान बडोदा येथे होणार आहे. मिताली राजच्या नेतृत्वाखाली भारतीय महिला संघाने दक्षिण आफ्रिकेविरुद्धची वनडे मालिका २-१ने जिंकली, तर हरमनप्रीतच्या नेतृत्वाखालील पाच सामन्यांची टी-२० मालिका ३-१ अशी जिंकली. आता ऑस्ट्रेलियाविरुद्ध या कामगिरीत सातत्य राखण्याचा भारतीय संघाचा प्रयत्न असेल. मालिकेतील पहिली वनडे १२ मार्च, दुसरी वनडे १५ मार्च आणि तिसरी वनडे १८ मार्चला होईल. यानंतर तिरंगी टी-२० मालिकेचे आयोजन करण्यात आले आहे. त्याचा संघ नंतर जाहीर करण्यात येईल, असे बीसीसीआयने कळविले आहे.

झूलनची टाच दुखावली असून तिला सहा आठवडे विश्रांती घेण्याचा सल्ला देण्यात आला आहे. झूलन गोस्वामीच्या जागी २४ वर्षीय सुकन्या परिदा हिची निवड करण्यात आली आहे. अष्टपैलू म्हणून ओळखली जाणारी सुकन्या, भारताकडून शेवटचा सामना नोव्हेंबर २०१६मध्ये खेळली आहे. १७ वर्षीय मुंबईच्या जेमिमा रॉड्रिग्जचाही संघात समावेश करण्यात आला असून, यष्टीरक्षक तानिया भाटिया हिचा संघात समावेश करण्यात आलेला नाही.

भारतीय संघ : मिताली राज (कर्णधार), हरमनप्रीत कौर, स्मृती मंधाना, पूनम राऊत, जेमिमा रॉड्रिग्ज, वेदा कृष्णमूर्ती, मोना मेश्राम, सुष्मा वर्मा (यष्टीरक्षक), एकता बिश्त, पूनम यादव, राजेश्वरी गायकवाड, शिखा पांडे, सुकन्या परिदा, पूजा वास्त्रकर, दीप्ती शर्मा.