नशीबवान! स्टंपला बॉल लागूनही रूट नाबाद

नवी दिल्लीः इंग्लंड आणि ऑस्ट्रेलिया संघांमध्ये सुरू असलेल्या अॅशेस मालिकेतील पहिल्या सामन्यात इंग्लंडचा कर्णधार जो रूट चांगलाच नशीबवान ठरला. जेम्स पेटीन्सनच्या गोलंदाजीवर यष्टीला चेंडू लागून मागे गेला. मात्र, बेल्स पडल्या नाहीत. त्यामुळे रूट नाबाद राहिला.

बर्हिंगम कसोटी सामन्याच्या दुसऱ्या दिवशी हा अजब प्रकार घडला. झालं असं की, पेटीन्सनच्या एका भेदक चेंडूवर रूट अडखळला. पंच जोएल विल्सन यांना वाटले की, बॅटला चेंडू लागून यष्टीमागे झेल टिपला गेला आहे. त्यामुळे पंचांनी रूटला बाद ठरवले. मात्र, पंचाच्या निर्णयाविरोधात रूटने रिव्ह्यू घेतला. यामध्ये चेंडू बॅटला न लागता स्टंपला लागल्याचे स्पष्ट झाले.

स्टंपला बॉल लागूनही बेल्स न पडल्यामुळे रूटला जीवनदान मिळाले आणि ऑस्ट्रेलियाचे खेळाडू नाराज झाले. यावेळी रूट ९ धावांवर खेळत होता. उपहारानंतर ५७ धावांच्या वैयक्तिक धावसंख्येवर रूट पीटर सिडलकरवी बाद झाला. रूटने ११९ चेंडूंचा सामना करत ५७ धावांची खेळी केली.