अफगाणिस्तानविरुद्ध अजिंक्य कर्णधार, इंग्लंडमधील वनडे मात्र 'बाद'
वृत्तसंस्था, बेंगळुरू
अपेक्षेप्रमाणे अफगाणिस्तानविरुद्धच्या एकमेव कसोटीसाठी भारतीय संघाची धुरा अजिंक्य रहाणेकडे सोपवण्यात आली आहे. पुढील महिन्यात हा सामना बेंगळुरूत रंगणार आहे. अफगाणिस्तानचा हा ऐतिहासिक पहिला कसोटी सामना असेल. या कसोटीद्वारे करुण नायर कसोटीत पुनरागमन करेल, तर मुंबईच्या शार्दूल ठाकूरचाही या संघात समावेश करण्यात आला आहे. इंग्लंड दौऱ्याच्या तयारीसाठी विराट कोहली कौंटी क्रिकेटमध्ये खेळणार आहे. त्यामुळे या कसोटीला मुकेल. त्याच्याऐवजी करुणची निवड झाली आहे. या संघनिवडींसाठी निवड समितीची बैठक बेंगळुरूत पार पाडली.
तांत्रिकदृष्ट्या परिपूर्ण असलेल्या अजिंक्यला इंग्लंड दौऱ्यावरील वनडे मालिकेतून मात्र वगळळेले आहे. आयपीएलआधी पार पडलेल्या दक्षिण आफ्रिका दौऱ्यावरील वनडेत रहाणेचा समावेश होता; पण आव्हानात्मक इंग्लंड दौऱ्यावरील मर्यादित षटकांच्या मालिकेसाठी अजिंक्यचा समावेश झालेला नाही. आयपीएलमधील सलामीच्या झुंजीत चेन्नईचे प्रतिनिधित्व करताना केदार जाधव जायबंदी झाला होता. तो अद्याप सावरेला नाही. त्यामुळे इंग्लंड दौऱ्यावरील वनडेसाठी त्याच्याऐवजी ३२ वर्षांच्या अम्बटी रायुडूची निवड झालेली आहे.
२०१६मध्ये ठोकलेल्या त्रिशतकामुळे करुण नायर चर्चेत आला होता. जायबंदी रहाणेऐवजी त्यावेळी त्याची कसोटी संघात निवड झाली होती; पण त्यानंतर ऑस्ट्रेलियाविरुद्धच्या तीन डावांत फक्त ५४ धावा करणेच त्याला जमले. अखेर गेल्या स्थानिक मोसमात सुरेख कामगिरी केल्याने नायरचा कसोटी सामन्यासाठी विचार झाला.
२६ वर्षांच्या शार्दूल ठाकूरची अफगाणिस्तानविरुद्धच्या कसोटीत बुमराहऐवजी निवड करण्यात आली आहे. शार्दूल याआधी कसोटी संघात होता; पण अंतिम अकरामध्ये त्याला संधी मिळाली नव्हती. गेले काही आठवडे कौंटी क्रिकेट खेळणारे चेतेश्वर पुजारा आणि इशांत शर्मा यांची अफगाणिस्तानविरुद्धच्या कसोटीसाठी निवड झाली आहे.
नजर अजिंक्यवर
कसोटी संघाचे नेतृत्व अजिंक्य रहाणेच्या शिरपेचातील आणखी एक मानाचा तुरा ठरला आहे; पण त्याला कामगिरी उंचवावी लागेल. श्रीलंकेविरुद्धच्या मालिकेतील पाच डावांत त्याला फक्त १७ धावा करता आल्या, तर दक्षिण आफ्रिका दौऱ्यावर त्याला दोन कसोटींमधून वगळण्यात आले होते. यामुळे वनडे पाठोपाठ त्याची कसोटी संघातील जागाही डळमळीत झाल्यासारखी वाटत होती. दक्षिण आफ्रिका दौऱ्यावरील तिसऱ्या कसोटी अजिंक्यला संधी मिळाली तेव्हा त्याने दोन डावांत ९ आणि ४८ धावांचे योगदान दिले होते. ती कसोटी ऐतिहासिक ठरली होती; कारण भारताने कसोटी विजय साजरा केला होता. रहाणेने याआधी तीन वनडे आणि आयपीएलमध्ये नेतृत्वाची धुरा वाहिली आहे. वयोगटातील स्पर्धांमध्ये त्याने मुंबईचे नेतृत्व केले आहे.
अफगाणिस्तानविरुद्धच्या कसोटीसाठी संघः अजिंक्य रहाणे (कर्णधार), शिखर धवन, विजय, राहुल, पुजारा, करुण नायर, साहा (यष्टीरक्षक), अश्विन, जाडेजा, कुलदीप यादव, उमेश यादव, मोहम्मद शमी, हार्दिक पंड्या, इशांत शर्मा, शार्दूल ठाकूर.
आयर्लंडमधील टी-२० मालिकेसाठी संघः विराट कोहली (कर्णधार), शिखर धवन, रोहित शर्मा, राहुल, सुरेश रैना, मनीष पांडे, धोनी (यष्टीरक्षक), दिनेश कार्तिक, चहल, कुलदीप यादव, वॉशिंग्टन सुंदर, भुवनेश्वरकुमार, जसप्रीत बुमराह, हार्दिक पंड्या, सिद्धार्थ कौल, उमेश यादव.
इंग्लंडमधील टी-२० मालिकेसाठी (तीन लढती) संघः विराट कोहली (कर्णधार), शिखर धवन, रोहित शर्मा, राहुल, सुरेश रैना, मनीष पांडे, धोनी, दिनेश कार्तिक, चहल, कुलदीप यादव, वॉशिंग्टन सुंदर, भुवनेश्वरकुमार, जसप्रीत बुमराह, हार्दिक पंड्या, सिद्धार्थ कौल, उमेश यादव.
इंग्लंडमधील वनडे मालिकेसाठी (तीन वनडे) संघः विराट कोहली (कर्णधार), शिखर धवन, रोहित शर्मा, राहुल, श्रेयस अय्यर, अम्बटी रायुडू, धोनी (यष्टीरक्षक), दिनेश कार्तिक, युझवेंद्र चहल, कुलदीप यादव, वॉशिंग्टन सुंदर, भुवनेश्वरकुमार, बुमराह, हार्दिक पंड्या, सिद्धार्थ कौल, उमेश यादव.
दृष्टिक्षेप
१)अजिंक्य रहाणेला इंग्लंड, आयर्लंड दौऱ्यावरील मर्यादित षटकांच्या संघात स्थान दिलेले नाही; पण कसोटी संघात तो असेल. तसेच भारतात रंगणाऱ्या अफगाणिस्तानविरुद्धच्या ऐतिहासिक कसोटीत तो भारताचे नेतृत्व करेल.
२)करुण नायर आणि शार्दूल ठाकूर यांची इंग्लंड दौऱ्यावरील कसोटी मालिकेसाठी निवड करण्यात आली आहे. ही मालिका १४ जूनपासून सुरू होईल. कौंटी क्रिकेटमध्ये खेळणार असल्याने त्याच्याऐवजी नायरची अफगाणिस्तानविरुद्धच्या कसोटीसाठी निवड झाली आहे.
३)अम्बती रायुडूची इंग्लंड दौऱ्यावरील वनडे संघात निवड झाली आहे ती जायबंदी केदार जाधवच्या जागी.