श्रीलंकेच्या पहिल्या दिवशी ९ बाद २७७ धावा
वृत्तसंस्था, कोलंबो
दक्षिण आफ्रिकेच्या केशव महाराजने शुक्रवारी मालिकेतील दुसऱ्या कसोटी क्रिकेट सामन्यात पहिल्याच दिवशी श्रीलंकेचे आठ बळी टिपले. पहिल्या दिवसअखेर श्रीलंकेच्या पहिल्या डावात ९ बाद २७७ धावा झाल्या होत्या.
यजमान श्रीलंकेने शुक्रवारी नाणेफेक जिंकून प्रथम फलंदाजी स्वीकारली. दनुष्का गुणतिलका आणि दिमुथ करुणरत्ने या जोडीने श्रीलंकेला ११६ धावांची सलामी दिली. या दोघांनाही महाराजनेच बाद केले. गुणतिलकाने १०७ चेंडूंमध्ये ६ चौकारांसह ५७, तर करुणरत्नेने ११० चेंडूंमध्ये ४ चौकारांसह ५३ धावा केल्या. तिसऱ्या स्थानावरील धनंजय डिसिल्वानेही ६० धावांची खेळी केली. त्यानंतर, मात्र श्रीलंकेचा डाव गडगडला. अखेरच्या सत्रात श्रीलंकेने पाच वकेट गमावल्या. ठराविक अंतराने फलंदाज बाद होत राहिल्याने श्रीलंकेची अवस्था ९ बाद २७७ अशी झाली. खेळ थांबला, तेव्हा अकिला धनंजया १६, तर रंगना हेरथ पाच धावांवर खेळत होते. केशव महाराजने ११६ धावांत ८ विकेट घेऊन कारकिर्दीतील सर्वोत्तम कामगिरीची नोंद केली. दिवसातील उर्वरित एक विकेट रबाडाने घेतली.
स्कोअरबोर्ड : श्रीलंका ८६ षटकांत ९ बाद २७७ (गुणतिलका ५७, करुणरत्ने ५३, धनंजय डिसिल्वा ६०, केशव महाराज ३२-६-११६-८, कॅगिसो रबाडा १६-३-३७-१) वि. दक्षिण आफ्रिका.
--------
खेळ आकड्यांचा
६ - एका कसोटी डावात ८ विकेट घेणारा केशव महाराज हा दक्षिण आफ्रिकेचा सहावा गोलंदाज ठरला. यापूर्वी, ह्यूज टेफिल्ड, गुफी लॉरेन्स, लान्स क्लूजनर, टीप स्नूक आणि अॅलन डोनाल्ड या दक्षिण आफ्रिकेच्या गोलंदाजांनी ही कामगिरी केली आहे.
२१ - श्रीलंकेच्या सलामी जोडीला तब्बल २१ कसोटी सामन्यांनमतर शतकी भागीदारी करता आली. यापूर्वी, ऑक्टोबर २०१६ मध्ये श्रीलंकेकडून शतकी सलामी नोंदवण्यात आली होती.