'विराट' शतकी खेळीनं भारताचा न्यूझीलंडवर विजय

मटा ऑनलाइन वृत्त । मोहाली

विराट कोहलीची दणदणीत दीडशतकी खेळी आणि महेंद्रसिंग धोनीच्या अर्धशतकी खेळीच्या जोरावर भारतानं न्यूझीलंडवर सात गडी राखून विजय मिळवला. नाबाद १५४ धावा करणारा कोहली सामनावीराचा मानकरी ठरला. न्यूझीलंडनं भारताला २८६ धावांचं आव्हान दिलं होतं. या विजयासह भारतानं ५ एकदिवसीय सामन्यांच्या मालिकेत २-१ अशी आघाडी मिळवली आहे.

भारतीय कर्णधार महेंद्रसिंग धोनीनं टॉस जिंकून न्यूझीलंडला प्रथम फलंदाजीचं आमंत्रण दिलं. न्यूझीलंडकडून गप्टील आणि लॅथम सलामीला आले. त्यांनी संघाला आक्रमक सुरूवात करून दिली. फलकावर ४६ धावा असताना गप्टील बाद झाला. त्यानं २७ धावा केल्या. त्यानंतर लॅथमनं ६१ धावा केल्या. सुरुवातीच्या दोन्ही सामन्यांत अपयशी ठरलेल्या टेलरनं ४४ धावांची खेळी केली. निशामनंही अर्धशतकी खेळी केली. पण दुसरीकडं न्यूझीलंडचा डाव गडगडत होता. १९९ धावांवर त्यांचे आठ गडी तंबूत गेले होते. पण हेनरीनं उत्कृष्ट खेळ करत निशामसोबत ८४ धावांची भागिदारी करून न्यूझीलंडला सुस्थितीत नेलं. न्यूझीलंडनं सर्वबाद २८५ धावा केल्या. भारताकडून उमेश यादव आणि केदार जाधवनं प्रत्येकी तीन गडी, तर बुमराह आणि मिश्रानं प्रत्येकी दोन गडी बाद केले.

न्यूझीलंडनं दिलेलं २८६ धावांचं आव्हान घेऊन भारताचे सलामीवीर रोहित शर्मा आणि अजिंक्य रहाणे मैदानात उतरले. पण ही जोडी हवी तशी सुरूवात करून देण्यात अपयशी ठरली. रहाणे अवघ्या ५ धावांवर बाद झाला. तर रोहितही १३ धावा करून माघारी परतला. त्यानंतर आलेल्या कोहली आणि महेंद्रसिंग धोनीनं सावध खेळी केली. त्यांनी १५१ धावांची भागिदारी करत भारताला विजयाकडे नेले. धोनीला शतक साजरं करता आलं नाही. तो ८० धावांवर बाद झाला. त्यानंतर आलेल्या मनीष पांडेनं कोहलीला उत्कृष्ट साथ देत भारतीय संघाला ७ गडी राखून विजय मिळवून दिला. कोहलीनं नाबाद १५४, तर पांडेनं नाबाद २८ धावा केल्या.