विराटऐवजी श्रेयसला संधी मिळण्याची शक्यता
वृत्तसंस्था, बेंगळुरू
जून महिन्यात होत असलेल्या अफगाणिस्तानविरुद्धच्या कसोटी सामन्यात भारताचा कर्णधार विराट कोहली खेळणार नसल्याने त्याच्याऐवजी भारतीय संघाचे नेतृत्व मुंबईकर अजिंक्य रहाणेकडे सोपविण्यात येणार आहे. शिवाय, विराटऐवजी या संघात मुंबईच्याच श्रेयस अय्यरला स्थान मिळण्याची शक्यता आहे. अफगाणिस्तानची ही पदार्पणातली कसोटी असून १४ जूनपासून ही कसोटी सुरू होईल.
कोहली हा त्या कालावधीत सरेकडून कौंटी क्रिकेट खेळणार असल्यामुळे या कसोटीत खेळू शकणार नाही. जून महिन्याच्या अखेरीस डब्लिन येथे होत असलेल्या आयर्लंडविरुद्धच्या दोन टी-२० क्रिकेट सामन्यातही कोहली खेळणार नाही.
कोहलीच्या अनुपस्थितीत अजिंक्यकडे अफगाणिस्तानविरुद्धच्या सामन्याची सूत्रे असतील तर टी-२० सामन्यांसाठी रोहित शर्मा भारतीय संघाचे नेतृत्व करील.
कोहली कौंटी क्रिकेटमुळे अफगाणिस्तानविरुद्ध खेळणार नसला तरी भारतीय संघातील बाकी सर्व कसोटीपटू या कसोटीत खेळणार आहेत. त्यामुळे सामना रंगतदार होईल, अशी चर्चा आहे.
चेतेश्वर पुजारा आणि इशांत शर्मा हे दोघेही यॉर्कशायरकडून ११ ते १४ मे या दरम्यान सरेविरुद्ध खेळल्यानंतर भारतात परतणार आहेत. त्यामुळे ते दोघेही भारतीय संघातून खेळू शकतील. यॉर्कशायरचा पुढील सामना २० जूनला हॅम्पशायरविरुद्ध होणार आहे.
बीसीसीआयच्या पदाधिकाऱ्यांनी यासंदर्भात सांगितले की, पुजाराच्या बाबतीत काही चुकीची माहिती समोर येत होती. पण तो अफगाणिस्तानविरुद्धच्या कसोटीत खेळणार आहे. तीच बाब इशांतच्या बाबतीतही आहे. ११ ते १४ मे या कालावधीत सामना झाल्यानंतर त्याला कुठल्याही सामन्यात लगेच खेळायचे नाही. रॉयल लंडन कप स्पर्धेतील कोणतेही सामने त्या कालावधीत नसल्याने ते अफगाणिस्तानविरुद्ध खेळायला मोकळे आहेत.
कोहलीची जागा कोण घेणार हा प्रश्न असला तरी एमएसके प्रसाद यांच्या नेतृत्वाखालील निवड समितीसमोर श्रेयस अय्यरचा पर्याय आहे. निवड समितीतील एका सदस्याने सांगितले की, सध्या आम्ही एकास एक असा संघबदल करणार आहोत. विराटऐवजी श्रेयस, जाडेजाऐवजी अक्षर पटेल, हार्दिकऐवजी विजय शंकर. निवडीची ही पद्धत ठरलेली आहे.
ऑस्ट्रेलियाविरुद्ध गेल्या वर्षी धरमशाला येथे झालेल्या कसोटीतही विराटऐवजी भारतीय संघात श्रेयसला संधी देण्यात आली होती. त्यावेळी कोहलीच्या खांद्याला दुखापत झाली होती आणि तो खेळू शकला नव्हता. पण त्यावेळी कुलदीप यादवला संघात स्थान मिळाल्यामुळे श्रेयसला भारतीय संघातून खेळता आले नव्हते. मात्र अफगाणिस्तानविरुद्ध अंतिम संघात स्थान मिळविण्यासाठी श्रेयसला मुरली विजय, शिखर धवन, केएल. राहुल, चेतेश्वर पुजारा व कर्णधार रहाणे यांच्याशी स्पर्धा करावी लागेल. शिवाय, रोहित शर्माही असेलच. मात्र त्याची कसोटीतील कामगिरी यथातथाच आहे.
सध्या आयपीएलमध्ये चमकत असलेल्या अंबटी रायुडूचाही भारतीय संघात विचार होण्याची शक्यता आहे. भारतीय अ संघाच्या इंग्लंड दौऱ्यासाठी पृथ्वी शॉ, शुभमन गिल, शिवम मावी या १९ वर्षांखालील वर्ल्डकपविजेत्या खेळाडूंचा विचार होऊ शकतो. भारताच्या या अ संघाच्या इंग्लंड दौऱ्यात इंग्लंड लायन्स (अ संघ) व वेस्ट इंडिज अ संघाशी २२ जूनपासून सामने सुरू होतील.
त्यानंतर राहुल द्रविडच्या मार्गदर्शनाखालील भारतीय अ संघ लायन्सविरुद्ध १६ ते १९ जून या कालावधीत चार दिवसांची कसोटी खेळणार आहे तर काही तीनदिवसांच्या लढतीही ते खेळतील. अफगाणिस्तानविरुद्धची कसोटी झाल्यानंतर काही भारतीय खेळाडू इंग्लंडमधील दौऱ्यासाठी वातावरणाशी जुळवून घेण्याचा एक भाग म्हणून तिथे जाणार आहेत.