लंडन : बांगलादेश क्रकेट संघाने मुख्य प्रशिक्षक स्टीव्ह ऱ्होड्स यांच्यासोबतचा करार मुदतीपूर्वी रद्द करून त्यांना सोडचिठ्ठी देण्याचा निर्णय घेतला आहे. वन-डे क्रिकेट वर्ल्ड कपमध्ये बांगलादेशने काही चांगले विजय नोंदवले असले, तरी साखळीअखेर त्यांना गुणतक्त्यात आठव्या स्थानावर समाधान मानावे लागले होते. बांगलादेश क्रिकेट बोर्ड (बीसीबी) आणि ऱ्होड्स यांनी परस्परसहमतीने करार रद्द करण्याचा निर्णय घेतल्याची माहिती बीसीबीचे सीईओ निझामुद्दीन चौधरी यांनी दिली.
अॅलन, पूरण करारबद्ध
सेंट जॉन्स (अँटिग्वा) : वर्ल्डकपहून परतलेल्या वेस्ट इंडिज संघातील फॅबियन अॅलन, निकोलास पूरण, ओशेन थॉमस या खेळाडूंना वेस्ट इंडिज क्रिकेट बोर्डाने (डब्लूआयसीबी) केंद्रीय कराराद्वारे करारबद्ध केले आहे. त्याचप्रमाणे, कर्णधार जेसन होल्डरसह शाय होप, अल्झारी जोसेफ, केमार रोच, डॅरेन ब्राव्हो, शिम्रॉन हेटमाएर आणि किमो पॉल या सात खेळाडूंना तिन्ही प्रकारच्या क्रिकेटसाठी करारबद्ध करण्यात आले आहे. १ जुलै ते ३० जून अशी या करारांची मुदत असून एकूण १९ पुरुष खेळाडूंशी डब्लूआयसीबीने करार केले आहेत.
योगराज यांची 'फटकेबाजी'
नवी दिल्ली : युवराजसिंगचे वडील आणि माजी वेगवान गोलंदाज योगराज यांनी पुन्हा एकदा महेंद्रसिंह धोनीवर टीका केली आहे. यासाठी त्यांनी अम्बटी रायुडूला पाठिंबा दिला आहे. वर्ल्ड कप संघात स्थान देण्यात न आल्याने रायुडूने तडकाफडकी निवृत्ती जाहीर केली. यावर योगराज म्हणाले, 'रायुडू, निवृत्तीचा निर्णय मागे घे. आणि या लोकांना तुझी क्षमता दाखवून दे. महेंद्रसिंह धोनीसारखे खेळाडू काही संघात कायम राहणार नाहीत. ही परिस्थिती काही कायम राहणार नाही.' रायुडूला अंतिम संघात स्थान न दिल्याने त्याने ट्विटरवरून नाराजी व्यक्त केली होती. निवड समितीला त्याचे ट्विट चांगलेच झोंबले होते.
सेलेस्टाइन यांचे निधन
चेन्नई : भारतीय फुटबॉल संघाचे माजी गोलरक्षक ए. यू. सेलेस्टाइन यांचे मंगळवारी अल्पशा आजाराने निधन झाले. ते ७३ वर्षांचे होते. त्यांच्या पश्चात पत्नी व मुलगा असा परिवार आहेत. सेलेस्टाइन यांनी १९६९ साली मर्डेका कप स्पर्धेमध्ये भारताचे प्रतिनिधित्व केले होते. राष्ट्रीय स्पर्धांमध्ये ते तमिळनाडू संघांकडून खेळत होते. निवृत्तीनंतर त्यांनी प्रशिक्षक म्हणून, तसेच अखिल भारतीय फुटबॉल संघटनेमध्येही (एआयएफएफ) काम केले होते.