चेंडू छेडछाड प्रकरणी कार्याध्यक्षांनी राजीनामा द्यावा !

वृत्तसंस्था, मेलबर्न

दक्षिण आफ्रिकेविरुद्धच्या कसोटीत झालेल्या चेंडूच्या छेडछाडप्रकरणी जो अहवाल मंगळवारी प्रसिद्ध झाला, त्यानंतर क्रिकेट ऑस्ट्रेलियाचे कार्याध्यक्ष डेव्हिड पीव्हर यांच्यावर राजीनाम्यासाठी दबाव वाढू लागला आहे.

मंगळवारी जाहीर झालेल्या एका स्वतंत्र अहवालात क्रिकेट ऑस्ट्रेलियातील वर्चस्ववादी संस्कृतीमुळे खेळाडूंमध्ये ही फसवणूक करण्याची वृत्ती बळावली. या अहवालामुळे पुन्हा एकदा ऑस्ट्रेलियन क्रिकेट वर्तुळात खळबळ उडाली आहे. या प्रकारामुळे क्रिकेट ऑस्ट्रेलियाचे मुख्य कार्यकारी अधिकारी जेम्स सूदरलँड, प्रशिक्षक डॅरेन लीमन आणि संघाच्या कामगिरीवर देखरेख करणारे पॅट हॉवर्ड यांनी आधीच राजीनामा दिला होता. पीव्हर यांची गेल्याच आठवड्यात पुन्हा एकदा कार्याध्यक्ष म्हणून नियुक्ती झाली पण त्यांनी पदाचा राजीनामा देण्यास नकार दिला. चेंडूशी छेडछाड केल्याप्रकरणी तुम्ही आणि क्रिकेट ऑस्ट्रेलिया बोर्डाने राजीनामा का देऊ नये, असा प्रश्न विचारल्यावर ते आकाशवाणीला मुलाखत देताना म्हणतात की, आता आपण इथून पुढे जायला हवे.

ऑस्ट्रेलियाचे माजी पंतप्रधान केव्हिन रुड यांनीही पीव्हर यांच्या राजीनाम्याची मागणी केली आहे. या प्रकाराची जबाबदारी क्रिकेट ऑस्ट्रेलियानेही घ्यायला हवी, अशी मागणी ऑस्ट्रेलियन क्रिकेटपटूंच्या संघटनेने केली आहे. या संघटनेचे प्रमुख ग्रेग डायर यांनी म्हटले आहे की, जी काही शिक्षा क्रिकेटपटूंना मिळाली आहे ती पुरेशी आहे. या खेळाडूंनी ऑस्ट्रेलियाकडून खेळण्याची बरीचशी संधी गमावली आहे. लोकांचा रोष सहन केला आहे, शिवाय, त्यांच्यावर जबर आर्थिक दंडाची कारवाईही झाली आहे. त्यामुळे मला क्रिकेट ऑस्ट्रेलियाला सांगावेसे वाटते की, त्यांना झाली तेवढी शिक्षा पुरे झाली, आता त्यांच्यावरील बंदी हटवा.