एम.एस. धोनी अकादमी घडवणार प्रशिक्षक

म.टा. क्रीडा प्रतिनिधी, नागपूर

उत्कृष्ट क्रिकेटपटू घडविणे आमचे लक्ष्य असले तरी अष्टपैलू खेळाडू घडविण्यासाठी उत्कृष्ट व दर्जेदार प्रशिक्षक आवश्यक आहेत. परंतु, सद्य:स्थितीत तज्ज्ञ प्रशिक्षकांची उणीव आहे. यातच खेळाडूंच्या संख्येत वृद्धी होत असून प्रशिक्षकांची संख्या कमी आहे. उत्कृष्ट प्रशिक्षक घडविण्यासाठी एम.एस. धोनी अकादमीने नागपुरात प्रशिक्षक अकादमी सुरू करण्याचा निर्णय घेतला आहे. या अकादमीच्या पहिल्या प्रशिक्षकांचे आठ दिवसाचे प्रशिक्षण शिबिर रविवारपासून सुरू झाले.

अकादमीबद्दल आर्का स्पोर्ट्सचे प्रमुख मिहिर दिवाकर माहिती देताना म्हणाले, भारतीय क्रिकेट नियामक मंडळातील तज्ज्ञांच्या मार्गदर्शनात धोनी क्रिकेट अकादमी ४ ऑगस्टपर्यंत हा उपक्रम राबविणार आहे. प्रशिक्षकांच्या प्रशिक्षणात चार महिला प्रशिक्षकांसह देशातील एकूण ३५ प्रशिक्षक सहभागी होणार आहेत. १९ वर्षांखालील विश्वविजेत्या भारतीय संघाचे सदस्य राहिलेले दिवाकर म्हणाले, सद्यस्थितीत खेळाडूंना योग्य व अत्याधुनिक प्रशिक्षण देणाऱ्या प्रशिक्षकांची मोजकीच आहे. त्यामुळे योग्य व तज्ज्ञ प्रशिक्षक घडले तर निश्चितच उत्कृष्ट क्रिकेटपटू घडतील, या उद्देशाने आम्ही तांत्रिकदृष्ट्या भक्कम असलेले प्रशिक्षक निर्माण करण्यावर भर देण्याचे ठरविले आहे. नागपूर शहरात पहिल्यांदाच प्रशिक्षकांचे शिबिर होत असून याच खेळातील पायाभूत बाबींशिवाय प्रथमोपचार व मानसोपचार तसेच खेळाडूंमध्ये नैतिकता रुजविण्यासाठी आवश्यक गोष्टी शिबिरात प्रशिक्षकांना शिकविण्यात येणार आहेत. अभ्यासक्रम पूर्ण झाल्यावर प्रशिक्षकांची इच्छा असेल तर त्यांना देशभरात आणि दुबई व सिंगापूर येथील आमच्या अकादमीत मानधनावर काम करण्याची संधी मिळेल. आठ दिवसाच्या शिबिरात लेखी व मैदानी अशा दोन प्रकारे बीसीसीआयचे तज्ज्ञ सत्यजीत लाहिरी व मंदार दळवी मार्गदर्शन करतील. याचबरोबर प्रशिक्षकांसाठी परीक्षेचे विविध टप्पे राहतील, असेही दिवाकर यांनी सांगितले. पत्रकार परिषदेला धोनी क्रिकेट अकादमीचे प्रमुख मंगेश राऊत, पराग जोशी, अमित होशिंग, बाबुराव यादव उपस्थित होते.