महाराष्ट्र मजबूत स्थितीत

वृत्तसंस्था, चेन्नई

केदार जाधवपाठोपाठ चिराग खुराणाने झळकविलेल्या शतकाच्या जोरावर महाराष्ट्राने रणजी करंडक क्रिकेट स्पर्धेतील आसामविरुद्धच्या लढतीत ५४२ धावांपर्यंत मजल मारली. त्यानंतर अनुपम संकलेचाच्या भेदक माऱ्यासमोर आसामची दुसऱ्या दिवसअखेर ३ बाद १३२ अशी स्थिती झाली होती.

महाराष्ट्राने पहिल्या दिवसअखेर ९० षटकांत ५ बाद ३५२ धावांपर्यंत मजल मारली होती. या धावसंख्येत दुसऱ्या दिवशी महाराष्ट्र संघ किती धावांची भर घालणार, याबाबत औत्सुक्य होते. पहिल्या दिवसाचा खेळ थांबला तेव्हा चिराग १४, तर विशांत मोरे ९ धावांवर खेळत होता. या दोघांनी १०५व्या षटकात महाराष्ट्राला चारशेचा टप्पा गाठून दिला. चिराग-विशांत यांनी पाचव्या विकेटसाठी २२६ चेंडूंत १२४ धावांची भागीदारी केली. महाराष्ट्राचा डाव ५४२ धावांवर संपुष्टात आला. चिरागने १८४ चेंडूंत दहा चौकारांसह नाबाद ११२ धावांची खेळी केली.

स्कोअरबोर्ड : महाराष्ट्र पहिला डाव १४४ षटकांत सर्वबाद ५४२ (केदार जाधव ११५, चिराग खुराणा नाबाद ११२, नौशाद शेख ९७, स्वप्नील गुगळे ५०, विशांत मोरे ४८, जमालुद्दीन ३-९१, अबु नचिम ३-८३) वि. आसाम पहिला डाव – ३५ षटकांत ३ बाद १३२ (रिशव दास खेळत आहे ५३, अनुपम संकलेचा ३-४५).