महाराष्ट्राचे चोख प्रत्युत्तर
सौरभ नवलेचे शतक; ४ बाद २७२ धावांपर्यंत मजल
कूचबिहार करंडक
म. टा. प्रतिनिधी, पुणे
सौरभ नवलेचे शतक आणि ओम भोसलेचे अर्धशतक या जोरावर महाराष्ट्राने १९ वर्षांखालील मुलांच्या कूचबिहार करंडक क्रिकेट स्पर्धेत दुसऱ्या दिवसअखेर ४ बाद २७२ धावांपर्यंत मजल मारून हिमाचल प्रदेश संघाला चोख प्रत्युत्तर दिले. तत्पूर्वी, हिमाचल प्रदेश संघाने पहिल्या डावात ३५४ धावा केल्या. त्यामुळे महाराष्ट्र संघ अद्याप ८२ धावांनी पिछाडीवर आहे.
गहुंजे येथील महाराष्ट्र क्रिकेट असोसिएशनच्या मैदानावर ही चारदिवसीय लढत सुरू आहे. पहिल्या डावात महाराष्ट्राची सुरुवात मनासारखी झाली नाही. डावाच्या नवव्या षटकात अभिषेक ताटे माघारी परतला. परीक्षित कश्यपने त्याला दीपिंदरसिंगकरवी अवघ्या नऊ धावांवर झेलबाद केले. यानंतर सौरभ आणि ओमने डावाची सूत्रे हाती घेतली. या जोडीने संयमी फलंदाजी करताना हिमाचल प्रदेशच्या गोलंदाजांची चांगलीच दमछाक केली. या जोडीने दुसऱ्या विकेटसाठी १७३ धावांची भागीदारी केली. हिमांशू बेकने ओम भोसलेला शतकापासून रोखले. ओमने १४० चेंडूंत १३ चौकारांसह ८४ धावा केल्या. याच षटकात हिमांशूने अथर्व काळेलाही शून्यावर माघारी पाठवले. यानंतर सौरभने सिद्धेश वीरला साथीला घेतले आणि महाराष्ट्राला अडीचशे धावांचा टप्पा ओलांडून दिला. रोहित नारंगने सौरभवचा त्रिफळा उडविला. सौरभने २४९ चेंडूंत १८ चौकार व १ षटकारसह १४५ धावा केल्या. दिवसाचा खेळ थांबला तेव्हा सिद्धेश वीर आणि साहिल चुरी मैदानावर होते.
तत्पूर्वी, महाराष्ट्राच्या गोलंदाजांनी अचूक मारा करून हिमाचल प्रदेशच्या उर्वरित चार फलंदाजांना अवघ्या दहा धावांच्या आत माघारी पाठवले. त्यामुळे ६ बाद ३४४ वरून हिमाचल प्रदेशचा डाव ३५४ धावांत आटोपला. महाराष्ट्राच्या राजवर्धन हंगर्गेकरने सहा विकेट घेतल्या.
संक्षिप्त धावफलक : हिमाचल प्रदेश : पहिला डाव - ९९.३ षटकांत सर्वबाद ३५४ (वैभव शर्मा १८१, कुशल पाल ५५, सरन ३९, दीपिंदरसिंग राणा २२, राजवर्धन हंगर्गेकर २९-४-१००-६, चुरी १५-५-३७-१, सोनावणे २२.३-४-१०८-३) वि. महाराष्ट्र : पहिला डाव - ७८ षटकांत ४ बाद २७२ (सौरभ नवले १४५, ओम भोसले ८४, सिद्धेश वीर खेळत आहे २४, अभिषेक ताटे ९, साहिल चुरी खेळत आहे ०, हिमांशू बेक १७-२-६९-२, परीक्षित कश्यप १३-३४९-१, रोहित नारंग ८-१-२६-१).