'आयसीसी' क्रिकेट संघाच्या कर्णधारपदी मिताली राज

मटा ऑनलाइन वृत्त । लंडन

'आयसीसी'च्या महिला क्रिकेट संघाच्या कर्णधारपदी टीम इंडियाची कर्णधार मिताली राजची निवड करण्यात आली आहे. भारतीय संघाचे नेतृत्व करताना मितालीने शानदार कामगिरी केली. विश्वचषकातील मितालीच्या कामगिरीची दखल घेत आयसीसीने तिला हा बहुमान दिला.

अंतिम फेरीत भारताला इंग्लंडविरोधात अवघ्या नऊ धावांनी पराभवाला सामोरे जावे लागले होते. कर्णधार म्हणून मितालीची कामगिरी अतिशय दमदार राहिली. मितालीने या विश्वचषक स्पर्धेत ४०९ धावा पटकावल्या. न्यूझीलंडविरुद्धच्या महत्त्वाच्या सामन्यात मितालीने कॅप्टन इनिंग खेळताना १०९ धावांची शतकी खेळी साकारली होती. त्याशिवाय या स्पर्धेत मिताली तीन अर्धशतकी खेळी ही साकारल्या होत्या. मिताली शिवाय भारताच्या हरमनप्रीत कौर आणि दिप्ती शर्मा यांनाही स्थान मिळाले. आयसीसीने जाहिर केलेल्या संघात इंग्लंडच्या चार, दक्षिण आफ्रिकेच्या ३ खेळाडूंचा समावेश करण्यात आला आहे. तर ऑस्ट्रेलियाची अष्टपैलू खेळाडू एलिस पॅरीला स्थान मिळाले आहे.