सिराजला अश्रू अनावर

राजकोट : आंतरराष्ट्रीय सामन्यात देशाचे प्रतिनिधित्व करायला मिळणे ही प्रत्येक खेळाडूसाठी अभिमानाची गोष्ट असते. भारतीय क्रिकेटपटूंसाठी टीम इंडियाच्या निळ्या जर्सीइतके मौल्यवान दुसरे काहीच नाही. त्यामुळे ती जर्सी पहिल्यांदा परिधान केली की ऊर भरून येणारच. अशीच भावना न्यूझीलंडविरुद्ध आंतरराष्ट्रीय टी-२०त पदार्पण करणाऱ्या वेगवान गोलंदाज महंमद सिराजची होती. दुसऱ्या टी-२० सामन्याआधी राष्ट्रगीत झाल्यानंतर सिराजला अश्रू अनावर झाले होते.

सिराजचे वडील रिक्षाचालक. पण, मुलाला क्रिकेटपटू बनवण्याचा निर्धार त्यांनी केला आणि त्यासाठी अथक परिश्रमही केले. वडिलांच्या या मेहनतीला सिराजच्या जिद्दीची जोड मिळाली आणि न्यूझीलंडविरुद्धच्या टी-२० मालिकेसाठी सिराजची टीम इंडियात निवड झाली. पहिल्या सामन्यात त्याला अंतिम संघात स्थान मिळाले नव्हते. पण, आशिष नेहराच्या निवृत्तीनंतर दुसऱ्या सामन्यात त्याला संधी मिळाली. सामन्याआधी टीम इंडियाचे मुख्य प्रशिक्षक रवी शास्त्री यांच्या हस्ते सिराजला प्रथेप्रमाणे ‘कॅप’ देण्यात आली. सर्वांनीच त्याला पहिल्या सामन्यासाठी शुभेच्छा दिल्या. त्यामुळे सिराजचा आनंद गगनात मावत नव्हता. त्यानंतर निळी जर्सी घालून राष्ट्रगीतासाठी उभा राहिला असताना, आजवरचा प्रवास त्याच्या डोळ्यासमोरून तरळून गेला आणि नकळत त्याचे डोळे पाणावले. पहिल्या सामन्यात त्याने ४ षटकांत ५३ धावा देत १ विकेट घेतली. पहिल्या सामन्यात छाप पाडण्यात अपयशी ठरला, तरी जसप्रीत बुमराहने त्याची पाठराखण केली. ‘त्याचा हा पहिलाच आंतरराष्ट्रीय सामना होता. त्यातच अशा खेळपट्टीवर गोलंदाजी करणे आव्हानात्मक असते. नव्या संघाशी जुळवून घेताना त्याला थोडा वेळ लागेल. यातून तो नक्कीच शिकेन. एक गोलंदाज म्हणून जेव्हा तुम्हाला मार पडतो, तेव्हा त्यातून तुम्हाला खूप काही शिकायला मिळते. पुढील लढतीत तो नक्कीच प्रभावी मारा करीन,’ असे बुमराह म्हणाला.