वनडेत ४९० धावा; न्यूझीलंडचा विश्वविक्रम

डबलीन :

न्यूझीलंडच्या महिला क्रिकेट संघाने वनडे सामन्यात ५० षटकांत ४ गड्यांच्या मोबदल्यात ४९० धावांचा डोंगर उभारून आंतरराष्ट्रीय क्रिकेटमध्ये नवा विश्वविक्रम रचला आहे. विशेष म्हणजे आधीचा सर्वोच्च धावसंख्येचा विश्वविक्रमही न्यूझीलंड संघाच्याच नावावर होता.

न्यूझीलंड संघाने आयर्लंडविरुद्धच्या वनडे सामन्यात ही विश्वविक्रमी धावसंख्या उभारली आहे. न्यूझीलंड संघाची कर्णधार सुझी बेट्सने ९४ चेंडूत केलेली १५१ धावांची तडाखेबंद खेळी आणि मॅडी ग्रीनने केलेल्या दमदार १२१ धावांच्या जोरावर न्यूझीलंडने आयर्लंडपुढे विजयासाठी ४९१ धावांचे विशाल लक्ष्य उभे केले.

आंतरराष्ट्रीय क्रिकेटमधील सर्वोच्च धावसंख्येचा विश्वविक्रम याआधी न्यूझीलंडच्या महिला संघानेच रचला होता. २९ जानेवारी १९९७ रोजी ख्राइसचर्च येथे झालेल्या सामन्यात न्यूझीलंडने पाकिस्तानविरुद्ध ५० षटकांत ५ गड्यांच्या मोबदल्यात ४५५ धावा केल्या होत्या. पुरुषांच्या संघांचा विचार केल्यास सर्वोच्च धावसंख्येचा विक्रम इंग्लंड संघाच्या नावावर आहे. इंग्लंडने ३० ऑगस्ट २०१६ रोजी पाकिस्तानविरुद्ध नॉटिंगहॅम येथे झालेल्या सामन्यात ३ गड्यांच्या मोबदल्यात ४४३ धावा केल्या होत्या.