लोढांच्या शिफारशींची अजून अंमलबजावणी नाही

कोलकाता : सर्वोच्च न्यायालयाने बीसीसीआयच्या कारभारासाठी नेमलेल्या प्रशासक समितीने प्रथमच दिलेल्या अहवालात ११ शिफारशींपैकी १० शिफारशींची अंमलबजावणी बीसीसीआयच्या संलग्न संघटनांनी केलेली नाही, असे मत मांडले आहे. केवळ अपंग क्रिकेटपटूंसाठी हॅण्डबुक ही शिफारस मान्य करण्यात आल्याचे अहवालात नमूद करण्यात आले आहे.

या शिफारशींपैकी नवे नियम व अटींचा स्वीकार, घटनेतील दुरुस्ती, आयपीएल नियमांमध्ये दुरुस्ती, एजंटससाठी नोंदणीचे नियम, खेळाडूंची संघटना, विभागांची पुनर्रचना, निवडणूक अधिकाऱ्याची नियुक्ती अशा शिफारशींचा समावेश आहे. या शिफारशींच्या अंमलबजावणीसाठी सर्वोच्च न्यायालयाने ३० सप्टेंबर २०१६ची मुदत दिली होती. पण त्या अजूनही पूर्ण करण्यात आलेल्या नाहीत.