आयपीएल लिलाव नव्हे, वर्ल्डकपवर लक्ष द्या

क्वीन्सलँडः भारतीय युवा क्रिकेट संघाचा प्रशिक्षक राहुल द्रविडने आपल्या चेल्यांना सावध केले आहे. शुक्रवारी आयसीसी युवा वनडे वर्ल्डकपमध्ये भारताची उपांत्यपूर्व फेरी रंगते आहे ती बांगलादेशशी. अन् त्याचवेळी भारतात आयपीएलच्या पुढील मोसमातील लिलावाचीही चर्चा सुरू झाली आहे. या लिलावाला भुलून युवा संघातील खेळाडू हकनाक फटकेबाजी करतील तसेच लिलावाचाच विचार केल्याने त्यांचे वर्ल्डकपकडे दुर्लक्षही होण्याची शक्यता आहे. या पार्श्वभूमीवर प्रशिक्षक द्रविडने आपल्या चेल्यांना समज देत म्हटले आहे की, 'आयपीएल लिलाव दरवर्षी येतो. मात्र हा वर्ल्डकप काही वर्षांनी येतो. हे व्यासपिठ सतत उपलब्ध होत नाही. तेव्हा तुम्हा सर्वांचे लक्ष फक्त वर्ल्डकपवरच हवे'.

कर्णधार पृथ्वी शॉ, शुभम गिल, हिमांशू राणा, अभिषेक शर्मा, रियान पराग, कमलेश नागरकोटी, शिवम मवी, अर्षदीपसिंग आणि हार्विक देसाई हे भारतीय युवा संघातील खेळाडू लिलावात असणार आहेत. हा लिलाव शनिवार व रविवारी बेंगळुरू येथे आयोजित करण्यात आला आहे. एका क्रिकेट वेबसाइटकडे द्रविडने याबाबत मत मांडलेः 'लिलाव होतच नाही, आपला त्याच्याशी संबंध नाही, अशी असे वागून चालणार नाही. आम्ही त्याबाबतही बोलतोच; पण सध्या प्राधान्य आहे ते फक्त वर्ल्डकपला. दीर्घकालिन ध्येय आणि अल्पकालिन ध्येय आपल्याला कळायला हवीत. त्यानुसार वाटचाल व्हावी, असे मला वाटते. आता सध्या तातडीने महत्त्वाचा आहे तो युवा वर्ल्डकप'.

भारताचे पारडे जड

क्विन्सटाउनः साखळीतील तिनही सामन्यांत अपराजित राहिलेल्या भारताची युवा वनडे वर्ल्डकप (१९ वर्षांखालील) उपांत्यपूर्व फेरीत शुक्रवारी भारताची गाठ पडेल ती बांगलादेशशी. भारतीय संघाचा सध्याचा फॉर्म पाहता या सामन्याचा विजेता म्हणून भारतालाच फेव्हरिट मानण्यात येत आहे.