प्रशिक्षक निवडीत कोहलीचा हस्तक्षेप चालणार नाही?

मटा ऑनलाइन वृत्त । नवी दिल्ली

भारतीय क्रिकेटमधील 'सुपरस्टार' संस्कृतीवर तोफ डागत सुप्रसिद्ध इतिहासकार रामचंद्र गुहा यांनी भारतीय क्रिकेट नियामक मंडळाच्या प्रशासकीय समितीचा राजीनामा दिल्यानंतर क्रिकेट वर्तुळात खळबळ उडाली आहे. गुहा यांच्या आरोपांची दखल घेऊन प्रशासकीय समितीनं दबावाची संस्कृती मोडून काढण्याच्या हालचाली सुरू केल्या असून त्याचा पहिला फटका कर्णधार विराट कोहलीला बसणार आहे. भारतीय संघाचा प्रशिक्षक निवडताना यापुढं कोहलीला कुठलाही विशेषाधिकार न देण्याचा निर्णय प्रशासकीय समितीनं घेतला आहे.

बीसीसीआयच्या सूत्रांकडून 'टाइम्स ऑफ इंडिया'ला याबाबत माहिती मिळाली आहे. भारतीय क्रिकेट संघाच्या प्रशिक्षकाची निवड क्रिकेट सल्लागार समिती करत असते. या समितीवर सध्या सचिन तेंडुलकर, सौरव गांगुली व व्ही. व्ही. एस. लक्ष्मण हे माजी क्रिकेटपटू आहेत. भारतीय संघाच्या पुढील प्रशिक्षकाच्या निवडीचा निर्णय यापुढं फक्त हीच समिती करेल, असं सर्वोच्च न्यायालयानं नियुक्त केलेल्या प्रशासकीय समितीचे अध्यक्ष विनोद राय यांनी स्पष्ट केलं आहे.

कर्णधार विराट कोहलीला संभाव्य प्रशिक्षकाबद्दल मत मांडायचं असल्यास तो सल्लागार समितीपुढं मांडू शकतो. तो आपली इच्छा प्रदर्शित करू शकतो. मात्र, अंतिम निर्णय सल्लागार समितीचाच राहील. विराटला याबाबतीत कोणताही 'नकाराधिकार' दिला जाणार नाही. त्याच्याकडं फक्त संघातील खेळाडू निवडण्याचा अधिकार असेल, असंही राय यांनी सांगितल्याचं समजतं.

विराट कोहली व भारतीय संघाचा विद्यमान प्रशिक्षक अनिल कुंबळे यांच्यामध्ये गेल्या काही दिवसांपासून वाद सुरू आहे. संघाच्या कामगिरीवर परिणाम होण्याइतपत हा वाद टोकाला गेला आहे. अशा परिस्थितीतच बोर्डानं नव्या प्रशिक्षकपदासाठी मुलाखती सुरू केल्या आहेत. कुंबळे या पदासाठी पुन्हा रिंगणात असून दिल्लीकर असलेल्या वीरेंद्र सेहवागनंही प्रशिक्षपदासाठी अर्ज केला आहे. कोहलीकडून या निवडीत हस्तक्षेप होण्याची शक्यता बोलून दाखवली जात होती. या पार्श्वभूमीवर प्रशासकीय समितीनं घेतलेली भूमिका महत्त्वाची मानली जात आहे.