वृत्तसंस्था, लंडन
पाकिस्तानने लॉर्ड्सवरील पहिल्या कसोटी क्रिकेट सामन्यात इंग्लंडवर नऊ विकेटनी सहज मात केली. पाकिस्तानने चौथ्याच दिवशी विजय साकार केला आणि दोन सामन्यांच्या मालिकेत १-०ने आघाडी मिळवली.
पाकिस्तानने इंग्लंडवर पहिल्या दिवसापासून वर्चस्व राखले. पाकिस्तानने इंग्लंडला पहिल्या डावात १८४ धावांत रोखले. यानंतर ३६३ धावा करून पाकिस्तानने पहिल्या डावात १७९ धावांची आघाडी मिळवली. तिसऱ्या दिवसअखेर पाकिस्तानने इंग्लंडची दुसऱ्या डावात ६ बाद २३५ अशी अवस्था केली होती. खरे तर पाकिस्तान संघाचा विजय तेव्हाच निश्चित वाटत होता. फक्त जोस बटलर आणि डॉमिनिक बेस किती लढा देतात, यावर सारे काही अवलंबून होते. मात्र, रविवारी सकाळच्या सत्रातील दुसऱ्याच षटकात महंमद अब्बासने बटलरला पायचीत टिपले. बटलर १३८ चेंडूंत ६ चौकारांसह ६७ धावांवर माघारी परतला. बटलर-बेस जोडीने इंग्लंडला ६ बाद ११० वरून ७ बाद २३६ धावांपर्यंत आणले होते. यानंतर आमीर आणि अब्बास यांनी इंग्लंडला २४२ धावांत रोखले. बेस १०६ चेंडूंत ८ चौकारांसह ५७ धावा केल्या. इंग्लंडने अखेरचे चार फलंदाज सात धावांत गमावले. पाकिस्तानला अवघ्या ६४ धावांचे लक्ष्य मिळाले. पाकिस्तानने विजयी लक्ष्य १२.४ षटकांत एका विकेटच्या मोबदल्यात पूर्ण केले. हारिस सोहेल आणि इमाम उल हक जोडीने लंचपूर्वीच पाकिस्तानला विजय मिळवून दिला. यात हारिस सोहेलने ३२ चेंडूंत नाबाद ३९ धावा केल्या. मालिकेतील दुसरी कसोटी हेडिंग्लेला होईल.
\Bसंक्षिप्त धावफलक : \Bइंग्लंड : पहिला डाव - सर्वबाद १८४ आणि दुसरा डाव - ८२.१ षटकांत सर्वबाद २४२ (जो रूट ६८, जोस बटलर ६७, डॉमिनिक बेस ५७, महंमद आमीर ४-३६, महंमद अब्बास ४-४१, शादाब खान २-६३) पराभूत वि. पाकिस्तान : पहिला डाव - सर्वबाद ३६३ आणि दुसरा डाव - १२.४ षटकांत १ बाद ६६ (हारिस सोहेल नाबाद ३९, इमाम उल हक नाबाद १८, जेम्स अँडरसन १-१२).
...
२१ - पाकिस्तानचा हा इंग्लंडवरील ८२व्या सामन्यातील २१वा कसोटी विजय ठरला.
५ - पाकिस्तानचा हा इंग्लंडवरील लॉर्ड्स मैदानावरील १५ सामन्यांतील पाचवा कसोटी विजय ठरला. यातील चार लढती पाकने गमावल्या असून, सहा अनिर्णित राहिल्या आहेत.
७ - इंग्लंडचा हा मागील दहा कसोटींतील सातवा पराभव ठरला.