मनीष पांडेचे शतक; भारत ‘ब’चा विजय

विशाखापट्टणम ः मनीष पांडेचे शतक आणि अक्षर पटेलच्या अष्टपैलू कामगिरीच्या जोरावर भारत ‘ब’ संघाने देवधर करंडक क्रिकेट स्पर्धेत तमिळनाडूचा ३२ धावांनी पराभव केला आणि अंतिम फेरीतील प्रवेश निश्चित केला. भारत ‘ब’ संघाचा हा दुसरा विजय ठरला. शनिवारी भारत ‘ब’ संघाने भारत ‘अ’ संघावर २३ धावांनी मात केली होती.

भारत ‘ब’ संघाने नाणेफेक जिंकून प्रथम फलंदाजी करताना निर्धारित ५० षटकांत ८ बाद ३१६ धावांपर्यंत मजल मारली होती. त्यात मनीष पांडे, अक्षर पटेल, शिखर धवन यांनी मोलाचा वाटा उचलला. मनीषने ११० चेंडूंत पाच चौकार आणि चार षटकारांसह १०४ धावांची, अक्षरने ४३ चेंडूंत एक चौकार आणि चार षटकारांसह ५१ धावांची, तर शिखर धवनने ४८ चेंडूंत सहा चौकार आणि दोन षटकारांसह ५० धावांची खेळी केली.
प्रत्युत्तर देताना तमिळनाडूला २८४ धावांपर्यंतच मजल मारता आली. सलामीवीर कौशिक गांधी आणि नारायण जगदीशन यांनी दुसऱ्या विकेटसाठी १०१ चेंडूंत ११४ धावांची भागीदारी केली. २६व्या षटकात अक्षरने जगदीशनचा त्रिफळा उडविला. जगदीशनने ५६ चेंडूंत पाच चौकार आणि तीन षटकारांसह ६४ धावांची खेळी केली. त्यानंतर कौशिकला इतर फलंदाजांकडून म्हणावी अशी साथ लाभली नाही. अखेरीस तमिळनाडूचा डाव २८४ धावांत संपुष्टात आला. कौशिकने १३४ चेंडूंत नऊ चौकारांसह सर्वाधिक १२४ धावांची खेळी केली.

संक्षिप्त धावफलक ः भारत ‘ब’ – ५० षटकांत ८ बाद ३१६ (मनीष पांडे १०४, अक्षर पटेल ५१, शिखर धवन ५०, अक्षय कर्णेवार २८, आर. साई किशोर ४-६०) वि.वि. तमिळनाडू – ४८.४ षटकांत सर्वबाद २८४ (कौशिक गांधी १२४, जगदीशन ६४, दिनेश कार्तिक २८, धवल कुलकर्णी ३-४५, अक्षर पटेल ३-५३, सी. मिलींद २-४२, कुलवंत खेज्रोलिया २-६२).