‘कमिन्स छाप पाडेल’

चेन्नईः जायबंदी मिचेल स्टार्कची जागा भरून काढण्यासाठी पॅट कमिन्सला संधी देत भारत दौऱ्यावर असलेल्या ऑस्ट्रेलिया संघात पाठवणे धाडसाचे आहे. ही जोखीम असून हा निर्णय अंगलट येऊ शकतो, अशा प्रतिक्रिया सध्या ऑस्ट्रेलियात उमटत आहेत; पण या संघाचे माजी गोलंदाजी प्रशिक्षक क्रेग मॅकड्रेमॉट यांचे मत अगदी विरुद्ध आहे. मिळालेल्या संधीचा फायदा उठवून कमिन्स छाप पाडेल असा विश्वास मॅकड्रेमॉट यांना वाटतो आहे.

‘गेल्या काही महिन्यांमध्ये कमिन्स सातत्याने चमक दाखवतो आहे. त्याला कसोटी संघात मिळालेली संधी हे त्याचेच फलित आहे. स्टार्कचे जायबंदी होऊन मायदेशी परतणे हा ऑस्ट्रेलिया संघासाठी मोठा धक्काच आहे; पण पॅट कमिन्स या दौऱ्यावर ठसा उमटवेल असा मला विश्वास वाटतो. त्याच्या गोलंदाजीत वेग आहे. तो स्टार्कसारखा चेंडूला छान रिव्हर्सही करू शकतो. एकूणच कमिन्सला पुन्हा कसोटी संघात बघून खूपच बरे वाटले’, असे मॅकड्रेमॉट यांनी टाइम्स समुहाशी बोलताना सांगितले.

२०११मध्ये कमिन्सने कसोटी पदार्पण केले ते मॅकड्रेमॉट प्रशिक्षकपदी असतानाच. दक्षिण आफ्रिकेविरुद्धच्या त्या जोहान्सबर्ग कसोटीत कमिन्सने दुसऱ्या डावात ७९ धावांत ६ मोहरे टिपत सामना ऑस्ट्रेलियाच्या बाजूने फिरवला होता.

भारत दौऱ्यावर कमिन्सचा फायदा फक्त गोलंदाज म्हणूनच नव्हे, तर चपळ क्षेत्ररक्षक म्हणूनही होऊ शकतो, असे मॅकड्रेमॉट नमूद करतात. ‘क्षेत्ररक्षणासह कमिन्स खालच्या क्रमांकाला येत उपयुक्त धावाही करून देतो. नव्या चेंडूसह त्याने तेजतर्रार मारा केला व जुन्या चेंडूला रिव्हर्स करण्यात यश मिळवले, तर ऑस्ट्रेलियाला खूप फायदा होईल’, याकडे मॅकड्रेमॉट लक्ष वेधतात.

गेल्या काही महिन्यांत पार पडलेल्या पाकिस्तान, श्रीलंका आणि न्यूझीलंडविरुद्धच्या मर्यादित षटकांच्या मालिकेसाठी कमिन्सला ऑस्ट्रेलियन संघात स्थान देण्यात आले होते. गंमत म्हणजे जेम्स पॅटिनसनसारखा गोलंदाज दुखापतीतून सावरला असूनही ऑस्ट्रेलियाने त्याच्याऐवजी कमिन्सला संधी दिली. ऑस्ट्रेलियाचा हा निर्णय त्यांना फळतो का ते बघायचे.