फिक्सिंगमुळे पाकिस्तानचा इरफान निलंबित

कराचीः पाकिस्तान सुपर लीगदरम्यान बुकीच्या संपर्कात असल्याचा आरोप असलेला तेज गोलंदाज महम्मद इरफान याला मंगळवारी पाकिस्तान क्रिकेट बोर्डाने (पीसीबी) तात्पुरते निलंबित केले आहे. या लीगदरम्यान भ्रष्टाचाराचा आरोप असलेला तो तिसरा पाकिस्तानी खेळाडू आहे.

पीसीबीने प्रसिद्धी पत्रकाद्वारे ही माहिती दिली आहे. पीसीबीच्या भ्रष्टाचार विरोधी नियमानुसार इरफानला नोटीस बजावण्यात आली आहे. इरफानवर नियम २.४.४ प्रकरणातील दोन नियमांचा भंग केल्याप्रकरणी आरोप ठेवण्यात आले आहे. त्याला या नोटिशीला उत्तर देण्यासाठी १४ दिवसांचा अवधी देण्यात आला आहे. त्वरित परिणाम म्हणून त्याच्यावर क्रिकेटच्या सर्व प्रकारात खेळण्यास तात्पुरती बंदी घालण्यात आली आहे. इरफानला पीसीबीच्या भ्रष्टाचार विरोधी पथकाला सामोरे जावे लागले. त्यात त्याने बुकींनी स्पॉट फिक्सिंग संदर्भात आपली भेट घेतल्याचे मान्य केले. बुकींची कुठलीही ऑफर स्वीकारली नसल्याचे इरफान म्हणत असला, तरी बुकींनी आपल्याशी संपर्क साधल्याची बाब त्याने बोर्डापासून लपवून ठेवली. आईच्या निधनामुळे आपल्याला जबर मानसिक धक्का बसला होता. त्यामुळे मागील तीन महिन्यांपासून आपल्यावर मानसिक दबाव असल्याचे कारण त्याने पुढे केले.

इरफान पाकिस्तानकडून चार कसोटी, ६० वनडे आणि २० आंतरराष्ट्रीय टी-२० सामने खेळला आहे. यापूर्वी शार्जील खान आणि खलिद लतीफ यांच्यावर कारवाई करण्यात आली आहे. हे तिन्ही खेळाडू दोषी आढळले तर त्यांच्यावर आजीवन बंदी घालण्यात येणार असल्याचे पीसीबीचे चेअरमन शाहरयार खान यांनी सांगितले.