भारताचा सलग चौथा विजय

कोलम्बोः पूनम यादवच्या प्रभावी फिरकीच्या जोरावर भारतीय संघाने महिलांच्या वर्ल्डकप प्राथमिक फेरीमध्ये अखेरच्या साखळी सामन्यात झिम्बाब्वेवर ९ विकेटनी मात केली. भारतीय महिलांचा या स्पर्धेच्या साखळी फेरीतील चारही सामने जिंकले असून, ‘ग्रुप ए’मध्ये भारत अग्रस्थानी राहून दिमाखात बाद फेरीत प्रवेश केला आहे.

सोमवारी झिम्बाब्वेने नाणेफेक जिंकून प्रथम फलंदाजी स्वीकारली. मात्र, भारतीय गोलंदाजीपुढे झिम्बाब्वेचा डाव अवघ्या ६० धावांत संपुष्टात आला. झिम्बाब्वेच्या चार खेळाडूंना खातेही उघडता आले नाही. झिम्बाब्वेकडून मेरी अॅन मुसोंडाने सर्वाधिक २६ धावा केल्या. भारताच्या पूनम यादवने १९ धावांत झिम्बाब्वेचा निम्मा संघ गारद करून वन-डे कारकिर्दीतील सर्वोत्तम कामगिरी नोंदवली. राजेश्वरी गायकवाडने २ विकेट्स घेतल्या.

भारतीय संघाने ९ षटकांमध्येच १ बाद ६१ धावा करून विजय निश्चित केला. वेदा कृष्णमूर्तीने १६ चेंडूंत ६ चौकारांसह २९ धावांची खेळी केली. मेश्राम २१, तर हरमनप्रीत कौर ११ धावांवर नाबाद राहिल्या.

स्कोअरबोर्ड : झिम्बाब्वे २८.५ षटकांत ६० (मेरी अॅन मुसोंडा २६, प्रेशियस मरांज १२, पूनम यादव ५-१९, राजेश्वरी गायकवाड २-१८) पराभूत विरुद्ध भारत ९ षटकांत १ बाद ६१ (वेदा कृष्णमूर्ती २९, मोना मेश्राम नाबाद २१, हरमनप्रीत कौर नाबाद ११, प्रेशियस मरांज १-२१). सामन्याची मानकरीः पूनम यादव.