भारतीय संघाचा सराव

वृत्तसंस्था, जोहान्सबर्ग

पहिल्या दोन्ही कसोटीत दारुण पराभव झाल्यानंतर निदान तिसरी कसोटी जिंकून यजमान दक्षिण आफ्रिकेला निर्भेळ यशापासून रोखण्यासाठी आता भारतीय संघ सज्ज झाला आहे. वॉन्डरर्सवर भारतीय संघाने चार तास सराव केला. भारत-दक्षिण आफ्रिकेतील तिसऱ्या कसोटीला २४ जानेवारीपासून सुरुवात होईल.

भारतीय संघाला केपटाऊनमधील पहिली कसोटी ७२ धावांनी गमवावी लागली होती. दुसऱ्या कसोटीत भारतीय संघ १३५ धावांनी पराभूत झाला. त्यावरून विराट कोहलीच्या नेतृत्वाखालील भारतीय संघाला जोरदार टीका सहन करावी लागली होती. या पराभवानंतर दडपण दूर करण्यासाठी भारतीय संघाने जोहान्सबर्गमधील विविध प्रेक्षणीय स्थळांना भेटी दिल्या आणि अखेर सकाळी त्यांनी सरावासाठी मैदानात धाव घेतली. प्रारंभी, फुटबॉल खेळल्यानंतर फलंदाजी, गोलंदाजी आणि क्षेत्ररक्षणाच्या प्रत्यक्ष सरावाला सुरुवात झाली. क्षेत्ररक्षण प्रशिक्षक आर. श्रीधर यांनी पार्थिव पटेल, लोकेश राहुल, अजिंक्य रहाणे यांच्यासह स्लिपमधील क्षेत्ररक्षणाचा सराव केला. त्यांच्यासोबत नंतर रोहित शर्मा आणि दिनेश कार्तिक यांनीही सरावात भाग घेतला. तोपर्यंत रहाणे, पार्थिव व राहुल फलंदाजीच्या सरावाकडे वळले. भारतीय संघाला गोलंदाजी करण्यासाठी रवाना झालेल्या शार्दूल ठाकूर आणि नवदीप सैनी यांनी राहुल, मुरली विजय, चेतेश्वर पुजारा यांना नेटमध्ये गोलंदाजी केली. विजय आणि राहुल यांनी नंतर फिरकी गोलंदाजीचाही सामना केला. राहुलला या सरावादरम्यान गुडघ्याला मार बसला;पण बर्फाच्या सहाय्याने त्याने वेदना कमी करण्याचा प्रयत्न केला. पहिल्या दोन कसोटीसाठी आश्चर्यकारकरित्या वगळण्यात आलेल्या रहाणेने विराट आणि हार्दिक पंड्यासह फलंदाजी केली. त्यामुळे अखेरच्या कसोटीत अजिंक्यला मधल्या फळीत संधी मिळणार याची शक्यता दृढ झाली आहे. अर्थात, तसे संकेतही देण्यात आले.

गोलंदाजांमध्ये भुवनेश्वर आणि मोहमंद शमी यांनी नव्या चेंडूने गोलंदाजी केली. रोहित शर्मा आणि शिखर धवन यांनी अखेरच्या टप्प्यात फलंदाजी केली. गोलंदाजांनीही नंतर फलंदाजीकडे लक्ष दिले. त्यात बूमराह, अश्विन, भुवनेश्वर आणि शमी यांचा समावेश होता. इशांत शर्मा आणि उमेश यादव यांनीही गोलंदाजीचा सराव केला.

खेळपट्टी गोलंदाजीस अनुकूल

दरम्यान, वॉन्डरर्सची खेळपट्टी ही वेगवान गोलंदाजीला अनुकूल असेल असे मत तेथील क्युरेटर बेथुएल बुथेलेझी यांनी व्यक्त केले आहे. त्यांनी म्हटले आहे की, दक्षिण आफ्रिकेच्या संघाने जशी खेळपट्टीची मागणी केली आहे, ती पूर्ण करण्याचा मी प्रयत्न केला आहे. खेळपट्टीवर पुरेसे गवत आहे आणि मी ते कापणार नाही. सामन्यापूर्वी त्याला पाणी दिले जाईल. या खेळपट्टीवर फिरकीला वाव नसेल. ज्यासाठी हे मैदान ओळखले जाते, ती चेंडूला मिळणारी उसळी आणि वेग इथे जरूर मिळेल. या मैदानावर सामन्याचा निकाल निश्चितच लागेल.