आयसीसीच्या अंडर १९ संघात पाच छोटे भारतीय

दुबई: १९ वर्षांखालील विश्वचषक विजयाचा जल्लोष करणाऱ्या भारतीय क्रिकेटप्रेमींसाठी आणखी एक खूषखबर आहे. आंतरराष्ट्रीय क्रिकेट परिषदेनं जाहीर केलेल्या १९ वर्षांखालील वर्ल्ड इलेव्हन संघात पाच भारतीय क्रिकेटपटूंना स्थान मिळालं आहे. भारताच्या १९ वर्षांखालील संघाला विश्वचषक मिळवून देण्यात या पाचही खेळाडूंचा सिंहाचा वाटा होता. त्यांच्या याच कामगिरीची दखल आयसीसीनं जागतिक संघ निवडताना घेतली आहे.

आयसीसीच्या संघात १९ वर्षांखालील भारतीय संघाचा कर्णधार पृथ्वी शॉ, अंतिम सामन्यात सामनावीर हा किताब पटकावणारा मनज्योत कालरा आणि मालिकावीर म्हणून गौरविला गेलेला शुभमन गिल याचा समावेश आहे. विश्वचषक स्पर्धेत पृथ्वी शॉनं भारतीय संघाचं यशस्वी नेतृत्व करताना २६१ धावा कुटल्या. तर, मनज्योत कालरानं अंतिम सामन्यात शतक झळकावत भारताला मजबूत स्थितीत नेऊन ठेवलं. त्यानं या स्पर्धेत २५२ धावा केल्या. भारतातर्फे स्पर्धेत सर्वाधिक ३७२ धावा शुभमन गिलनं केल्या. तर, विश्वचषक स्पर्धेत १४ गडी बाद करणारा डावखुरा फिरकी गोलंदाज अनुकूल रॉय व ९ गडी बाद करणारा जलदगती गोलंदाज कमलेश नागरकोटी यालाही स्थान मिळालं आहे.

असा आहे आयसीसीचा अंडर १९ विश्वचषक संघ

पृथ्वी शॉ, मनज्योत कालरा, शुभमन गिल, फिन अॅलन (न्यूझीलंड), रेनार्ड व्हॅन टोंडर (दक्षिण अफ्रिका, कर्णधार), वँडिल मॅक्वेतू (यष्टीरक्षक - द. अफ्रिका), अनुकूल रॉय, कमलेश नागरकोटी (भारत), गेराल्ड कोझी (द. अफ्रिका), कियास अहमद (अफगाणिस्तान), शाहीन अफ्रिदी (पाकिस्तान).