पृथ्वी शॉनं करून दाखवला सचिनसारखा पराक्रम

मटा ऑनलाइन वृत्त | लखनऊ

मुंबईचा उदयोन्मुख क्रिकेटपटू पृथ्वी शॉ यानं दुलीप करंडक स्पर्धेत मास्टर ब्लास्टर सचिन तेंडुलकरच्या जुन्या विक्रमाशी बरोबरी केली आहे. या स्पर्धेतील पहिल्याच सामन्यात शतक ठोकण्याचा पराक्रम त्यानं करून दाखवला आहे.

सचिन तेंडुलकरनं दुलीप ट्रॉफीमध्ये शतक झळकावलं, तेव्हा त्याचं वय १७ वर्षं २६२ दिवस इतकं होतं. त्याच्यानंतर दीपक हुड्डा या फलंदाजानंही दुलीप ट्रॉफीमध्ये पदार्पणातच शतक केलं. त्यानंतर आता १७ वर्षं ३२० दिवस इतकं वय असताना पृथ्वीनं ही किमया केली आहे.

चार वर्षांपूर्वी मुंबईतील हॅरिस शिल्ड स्पर्धेत ५४६ धावांची विराट खेळी करून पृथ्वी शॉनं सगळ्यांचंच लक्ष वेधून घेतलं होतं. त्यानंतर अलीकडेच मुंबईच्या रणजी संघातही त्याची निवड झाली आणि तामिळनाडूविरोधात १२० धावा करून त्यानं ती सार्थही ठरवली. दुलीप ट्रॉफीमध्ये तो इंडिया रेड संघाचं प्रतिनिधित्व करतोय. कारकिर्दीतील प्रथम श्रेणीचा तिसराच सामना खेळणाऱ्या पृथ्वीनं इंडिया ब्ल्यू संघाविरुद्ध १८ चौकार आणि एक षटकार लगावत १५४ धावा तडकावल्या. कर्णधार दिनेश कार्तिकसोबत त्यानं तिसऱ्या विकेटसाठी २११ धावांची भागीदारी रचली.