हैदराबादः अंकित राजपूतच्या अचूक गोलंदाजीच्या जोरावर सनरायझर्स हैदराबाद संघाने आयपीएल टी-२० क्रिकेट स्पर्धेत किंग्ज इलेव्हन पंजाब संघाला १३२ धावांत रोखले. मनीष पांडेच्या अर्धशतकाच्या जोरावर हैदराबादला घरच्या मैदानावर खेळताना निर्धारित २० षटकांत ६ बाद १३२ धावा फलकावर लावल्या. अंकितने हैदराबादचा निम्मा संघ गारद केला.
उप्पलच्या राजीव गांधी आंतरराष्ट्रीय स्टेडियममध्ये ही लढत झाली. किंग्ज इलेव्हन पंजाब संघाचा कर्णधार आर. अश्विनने नाणेफेक जिंकून प्रथम क्षेत्ररक्षण करण्याचा निर्णय घेतला. त्याचा हा निर्णय गोलंदाजांनी अचूक ठरविला. पंजाबच्या गोलंदाजांनी सुरुवातीपासूनच हैदराबादच्या फलंदाजांवर अंकुश राखला. डावाच्या पहिल्याच षटकातील चौथ्या चेंडूवर राजपूतने केन विल्यमसनला खातेही उघडू न देता माघारी पाठवले. याचे दडपण न घेता शिखर धवन आणि वृद्धिमन साहा यांनी शरणला प्रत्येकी एक चौकार लगावला. यानंतर धवनने राजपूतच्या पुढच्या षटकातील पहिल्याच चेंडूवर चौकार मारला. मात्र, दुसऱ्याच चेंडूवर स्लीपमधील करुण नायरने धवनचा सुरेख झेल टिपला. अवघ्या १६ धावांत हैदराबादची सलामी जोडी माघारी परतली होती. पुढच्या षटकात मनीष पांडेला अश्विनकडून जीवदान मिळाले. या वेळी पांडे चार धावांवर खेळत होता. यानंतर राजपूतने आपल्या पुढच्या षटकात साहाचीही अडसर दूर केला. साहाला अवघ्या सहा धावा करता आल्या. यानंतर पुढच्याच चेंडूवर पांडेला पुन्हा एकदा जीवदान मिळाले. या वेळी टायने त्याचा झेल सोडला. राजपूतने अप्रतिम स्पेल टाकला. त्याने तीन षटकांत अवघ्या नऊ धावा देत तीन गडी बाद केले. यानंतर आलेल्या शकीब अल हसनने शरणला दोन चौकार मारून दडपण कमी करण्याचा प्रयत्न केला. पॉवर-प्लेच्या पहिल्या सहा षटकांत हैदराबादने ३ बाद ३७ धावा केल्या होत्या.
यानंतर मनीष पांडे आणि शकीबने सावध फलंदाजी केली. दहा षटकांअखेर हैदराबादने ३ बाद ६२ धावा केल्या होत्या. डावाच्या चौदाव्या षटकात मुजीब उर रहमानने शकीबल बाद करून ही जोडी फोडली. शकीबने २९ चेंडूंत २८ धावा केल्या. त्याने पांडेसह चौथ्या विकेटसाठी ५२ धावा जोडल्या. यानंतर पांडेने युसूफ पठाणच्या साथीने खेळताना हैदराबादला सव्वाशे धावांचा टप्पा ओलांडून दिला. विशेष म्हणजे पांडेला सतराव्या षटकातही जीवदान मिळाले. या वेळी पांडे ४६ धावांवर होता. पांडेने तीन जीवदानांचा फायदा घेत ४८ चेंडूंत आपले अर्धशतक पूर्ण केले. युसूफ पठाणला सात धावांवर असताना तिवारीने जीवदान दिले. यानंतर राजपूतने आपल्या अखेरच्या षटकात पांडेलाही बाद केले. त्याने ५१ चेंडूंत ३ चौकार व १ षटकारसह ५४ धावा केल्या. अखेरच्या चेंडूवर राजपूतने महंमद नबीलाही माघारी पाठवले आणि डावातील पाच विकेट पूर्ण केल्या. पठाणने १९ चेंडूंत १ चौकार व १ षटकारसह नाबाद २१ धावा केल्या.
स्कोअरबोर्ड : सनरायझर्स हैदराबाद २० षटकांत ६ बाद १३२ (मनीष पांडे ५४, शकीब अल हसन २८, युसूफ पठाण नाबाद २१, अंकित राजपूत ४-०-१४-५) वि. किंग्ज इलेव्हन पंजाब.