'जंटलमन' द्रविडने नम्रपणे नाकारली 'डॉक्टरेट'!

मटा ऑनलाइन वृत्त । बेंगळुरू

टीम इंडियाचा माजी कर्णधार आणि 'द वॉल' म्हणून ओळखला जाणारा क्रिकेटवीर राहुल द्रविडनं बेंगलोर विद्यापीठाची मानद डॉक्टरेट पदवी स्वीकारण्यास नम्रपणे नकार दिला आहे. मला मानद डॉक्टरेट नको, मी स्वतः क्रीडा क्षेत्रात संशोधन करून ही मानाची उपाधी मिळवेन, असं त्यानं विद्यापीठाला प्रांजळपणे सांगितलं.

राहुल द्रविड मूळचा बेंगळुरूचा. त्याचं शालेय आणि महाविद्यालयीन शिक्षण तिथेच झालं आणि क्रिकेटचं तंत्रही तो तिथेच शिकला. स्वाभाविकच, त्यानं आंतरराष्ट्रीय क्रिकेटविश्वात केलेल्या कामगिरीचा बेंगळुरूला विशेष अभिमान आहे. भारतीय क्रिकेटमधील त्याच्या योगदानाचा गौरव करण्याच्या हेतूनेच, त्याला डॉक्टरेट देण्याची इच्छा बेंगलोर विद्यापीठानं व्यक्त केली होती. २७ जानेवारीला ५२व्या पदवीदान सोहळ्यात त्याला हा सन्मान प्रदान केला जाणार होता. परंतु, कुठलंही संशोधन केलेलं नसताना डॉक्टरेट स्वीकारणं 'जंटलमन' द्रविडच्या मनाला तितकंसं पटलं नसावं. म्हणूनच, त्यानं ही डॉक्टरेट नाकारली.

मानद डॉक्टरेटसाठी आपली निवड केल्याबद्दल राहुल द्रविडनं बेंगलोर विद्यापीठाचे आभार मानले. क्रीडा क्षेत्रात सखोल अभ्यास किंवा संशोधन करून मी डॉक्टरेट मिळवेन, मला मानद डॉक्टरेट नको, असंही त्यानं विद्यापीठाला कळवलं.

Rahul Dravid declines Bangalore University Hon. degree, says would like to earn doctrate by accomplishing some academic research in sport pic.twitter.com/pP3xqo7EYz — ANI (@ANI_news) January 25, 2017 द्रविडने डॉक्टरेट पदवी घेण्यास नकार दिल्याची ही दुसरी वेळ आहे. २०१४ मध्ये गुलबर्गा विद्यापीठाकडून त्याला डॉक्टरेट पदवी देण्यात येणार होती; पण त्यावेळीही द्रविडने नकार दिला होता. त्याच्या या नम्रतेतून त्याची 'साधी राहणी, उच्च विचारसरणी' स्पष्टपणे जाणवते.