श्रीलंका-न्यूझीलंड कसोटी पावसामुळे अनिर्णित

वेलिंग्टन : पावसाच्या व्यत्ययामुळे श्रीलंका-न्यूझीलंड यांच्यातील पहिला कसोटी क्रिकेट सामना अनिर्णित राहिला. लढतीच्या पाचव्या आणि अखेरच्या दिवशी केवळ १३ षटकांचाच खेळ होऊ शकला. मात्र, या दरम्यानही न्यूझीलंडच्या गोलंदाजांना श्रीलंकेची कुसल मेंडिस-अँजेलो मॅथ्यूज ही जोडी फोडता आली नाही. मेंडिस-मॅथ्यूज जोडीने ३ बाद १३ वरून श्रीलंकेचा डाव सावरला. कसोटीचा पूर्ण चौथा दिवस या जोडीने खेळून काढला होता. दिवसभरात एकही विकेट न मिळण्याची घटना २००८नंतर कसोटीत प्रथमच घडली होती.

बुधवारी मेंडिस-मॅथ्यूजने ३ बाद २५९ वरून पुढे खेळायला सुरुवात केली. पाहुण्या श्रीलंका संघाने दुसऱ्या डावात ३ बाद २८७ धावा केल्या. यानंतर पावसामुळे खेळ होऊ शकला नाही आणि पंचांनी लढत अनिर्णित राहिल्याचे जाहीर केले. डावाने पराभव टाळण्यासाठी श्रीलंकेला अद्याप नऊ धावांची गरज होती. मेंडिसने ३३५ चेंडूंत १६ चौकारांसह नाबाद १४१, तर मॅथ्यूजने ३२३ चेंडूंत ११ चौकारांसह नाबाद १२० धावा केल्या. या जोडीने चौथ्या विकेटसाठी २७४ धावांची अभेद्य भागीदारी रचली. श्रीलंकेकडून न्यूझीलंडविरुद्धची ही विक्रमी भागीदारी ठरली. न्यूझीलंडने पहिल्या डावात ५७८ धावा केल्यानंतर त्यांना डावाने विजयाची संधी होती. मात्र, मेंडिस-मॅथ्यूज जोडीने त्यांच्या आशेवर पाणी फेरले. जागतिक कसोटी क्रमवारीत सहाव्या स्थानावर असणाऱ्या श्रीलंकेचा या कामगिरीमुळे आत्मविश्वास नक्कीच उंचावला असणार. कारण, गेल्या महिन्यात इंग्लंडने श्रीलंकेविरुद्ध ३-० असे निर्भेळ यश मिळवले होते. मालिकेतील दुसरी आणि अखेरची कसोटी २६ डिसेंबरपासून ख्राईस्टचर्च येथे सुरू होणार आहे. या मैदानावर श्रीलंकेला मागील तीन लढतींत एकही विजय मिळवता आलेला नाही.