टीम इंडियाला शुभेच्छा देताना राजीव शुक्ला चुकले!

मटा ऑनलाइन वृत्त | नवी दिल्ली

भारतीय महिला क्रिकेट संघाने वर्ल्डकप स्पर्धेत बलाढ्य ऑस्ट्रेलियाला हरवून फायनलमध्ये दणक्यात प्रवेश केला. संपूर्ण देशभरात टीम इंडियाच्या कामगिरीचं कौतुक होतआहे. आयपीएलचे चेअरमन आणि राज्यसभा सदस्य राजीव शुक्ला यांनीही ट्विटरच्या माध्यमातून टीम इंडियाला शुभेच्छा दिल्या. पण चुकीच्या ट्विटमुळे राजीव शुक्लांवर टीकेचा भडिमार होत आहे.

भारतीय महिला क्रिकेट संघाने नेमकं कोणत्या स्पर्धेत यश मिळवलंय हेच राजीव शुक्ला विसरले. त्यांनी वर्ल्डकप स्पर्धेऐवजी चॅम्पियन्स ट्रॉफीच्या फायनलमध्ये प्रवेश केल्याबद्दल टीम इंडियाला शुभेच्छा दिल्या. शुक्ला यांच्या या ट्विटनंतर नेटिझन्सनी त्यांची चांगलीच खिल्ली उडवली. नेटिझन्सच्या प्रतिक्रियेनंतर शुक्ला यांना आपली चूक लक्षात आली आणि त्यांनी ट्विट डिलीट केलं.


'ऑस्ट्रेलियाला पराभूत करून चॅम्पियन्स ट्रॉफीच्या अंतिम फेरीत प्रवेश केल्याबद्दल टीम इंडियाला शुभेच्छा. हरमनप्रीतने चांगली कामगिरी केली.', असं ट्विट शुक्ला यांनी केलं होतं. जागरूक नेटिझन्सनी शुक्ला यांना त्यांची चूक त्वरित लक्षात आणून दिली.

भारतीय महिला क्रिकेट संघ वर्ल्डकपच्या सेमीफायनलमध्ये ऑस्ट्रेलियाला ३६ धावांनी पराभूत करून फायनलमध्ये पोहोचला आहे. भारताने प्रथम फलंदाजी करून २८१ धावा केल्या होत्या. प्रत्युत्तरात ऑस्ट्रेलियाचा डाव २४५ धावांत संपुष्टात आला. हरमनप्रीत कौर भारतीय संघाच्या विजयाची शिल्पकार ठरली. तिने सर्वाधिक १७१ धावांची नाबाद खेळी साकारली.