शिवम दुबेचे दुसरे शतक; मुंबई २९७

मुंबई : अष्टपैलू शिवम दुबेने पुन्हा एकदा मुंबईला आधार दिला. गुजरातविरुद्ध वानखेडे स्टेडियमवर सुरू झालेल्या रणजी करंडक क्रिकेट स्पर्धेतील अ गटाच्या लढतीत शिवमने ११० धावांची खेळी केली. त्यामुळे मुंबईने पहिल्या दिवशी २९७ धावांपर्यंत मजल मारली.

शिवमला १४ धावांवर जीवदान मिळाले. पण त्याचा पुरेपूर फायदा उठवत त्याने प्रथम श्रेणी क्रिकेटमधील आपले दुसरे शतक नोंदविले. राजूल भटने स्लिपमध्ये त्याला झेल सोडला होता. नवी दिल्लीत रेल्वेविरुद्धच्या मुंबईच्या पहिल्या सामन्यातही शिवमने शतक ठोकले होते. हे त्याचे प्रथम श्रेणीतील पहिले शतक होते.

१२८ चेंडूंचा सामना करत केलेल्या या शतकात ८ चौकार आणि एका षटकाराचा समावेश होता. मुंबईचा डाव एकावेळी ५ बाद ७४ असा अडचणीत सापडलेला असताना शिवम मदतीला धावून आला. प्रथम शिवमने सिद्धेश लाडसह (६२) सहाव्या विकेटसाठी ७४ धावांची भागीदारी केली तर कर्णधार धवल कुलकर्णीसह (२३) त्याने सातव्या विकेटसाठी ८४ धावा जोडल्या.

मुंबईच्या हिरव्या खेळपट्टीवर मुंबईच्या फलंदाजीची सुरुवात डळमळीत झाली. अखिल हेरवाडकर (०) आणि जय बिस्ता (८) हे सलामीवीर झटपट माघारी परतले तर सूर्यकुमार यादव (४०) आणि सिद्धेश यांनी ५३ धावांची भागीदारी करून या घसरगुंडीला लगाम घातला. मात्र सूर्यकुमारने बेफिकीर फटका मारून विकेट गमावली आणि मुंबईची स्थिती ३ बाद ७४ अशी झाली. त्यानंतर अरमान जाफर (०) आणि आदित्य तरे (०) झटपट बाद झाले आणि मुंबईचा संघ ५ बाद ७४ अशा कठीण परिस्थितीत सापडला.

शिवम पियुष चावलाच्या गोलंदाजीवर बाद झाल्यानंतर ध्रूमिल मटकरने ५३ चेंडूंत ४७ धावा करत आपले पदार्पण साजरे केले. त्यानंतर मात्र मुंबईचा डाव ८०.२ षटकांत संपुष्टात आला.

स्कोअरबोर्ड : मुंबई २९७ (शिवम दुबे ११०, सिद्धेश लाड ६२, अरझान नागवासवाला ५-७८) वि. गुजरात.