शास्त्रींनी सोडले आयसीसीचे पद

नवी दिल्लीः भारताचे माजी कर्णधार, संघसंचालक रवी शास्त्री यांनी आयसीसीतील मानाच्या क्रिकेट समितीमधील पदाचा राजीनामा दिला आहे. क्रिकेट समितीचे अध्यक्षपद भारतीय संघाचे नवे प्रशिक्षक अनिल कुंबळे यांच्याकडे असून शास्त्री या समितीमध्ये माध्यमांचे प्रतिनिधी म्हणून काम बघत होते. ‘मी गेली सहा वर्षे आयसीसीमध्ये काम करत आहे. मात्र मला काही वैयक्तिक कामांसाठी वेळ हवा आहे. त्यामुळे मी याआधीच राजीनामा आयसीसीकडे सोपवला आहे’, असे शास्त्री यांनी वृत्तसंस्थेला सांगितले.

आपले कारण यावेळी त्यांनी खूप स्पष्टीकरण देऊन सांगितले नसले, तरी भारतीय संघाचे प्रशिक्षक पद हुकल्याच्या धक्क्यातून ते अजून सावरलेले नाहीत असे बोलले जाते आहे. तसेच भारताच्या प्रशिक्षकपदी निवड झालेले कुंबळे याच समितीचे अध्यक्ष असल्याने कामकाजाच्यावेळी त्यांच्याशी संवाद साधण्याची वेळ येईल. हे टाळण्यासाठी शास्त्री यांनी क्रिकेट समितीमधील पद सोडल्याचे समजते. तसेच प्रशिक्षकपद न मिळाल्याने नाराज झालेल्या शास्त्री यांनी मीडियाला मुलाखती देत प्रशिक्षकाची नेमणूक करणाऱ्या सल्लागार समितीमधील सौरव गांगुलीवर तिखट शब्दात टीका केली होती. गांगुलीनेही प्रत्युत्तर देताना शास्त्री यांची खरडपट्टी काढताना मागे पुढे पाहिले नाही. या सगळ्या प्रकारानंतर शास्त्री यांनी पद सोडण्याचा निर्णय घेतल्याचे बोलले जाते आहे.

‘प्रशिक्षकपद स्वीकारल्यानंतरही कुंबळे क्रिकेट समितीच्या अध्यक्षपद सांभाळणार आहे. त्यामुळे समितीच्या बैठकीत शास्त्री व कुंबळे यांचा आमनासामना होणे सहाजिकच आहे. हे शास्त्री यांना सध्या तरी नको आहे. तसेच सौरव गांगुलीप्रमाणे रवीही भावूक असल्याने आपल्याला नाकारण्यात आल्याचे अजूनही त्याच्या पचनी पडलेले नाही’, असे बीसीसीआयमधील सुत्रांनी वृत्तसंस्थेला सांगितले आहे.