भारतीय संघाच्या मुख्य प्रशिक्षकपदी रवी शास्त्रीच!

नवी दिल्लीः भारतीय संघाच्या मुख्य प्रशिक्षकपदी रवी शास्त्री राहणार की नाही, याबद्दलची अनिश्चितता जवळपास संपुष्टात आल्यात जमा आहे. कारण क्रिकेट सल्लागार समितीने रवी शास्त्रींना मुख्य प्रशिक्षकपदी कायम ठेवण्याचे जवळपास निश्चित केला आहे.

रवी शास्त्रींच्या कार्यकाळात भारतीय क्रिकेट संघाची कामगिरी चांगली झाली आहे. त्यामुळे कर्णधार विराट कोहलीच्या नेतृत्वाखालील भारतीय संघाच्या मुख्य प्रशिक्षकपदी रवी शास्त्रींना कायम ठेवण्यात येणार आहे, अशी माहिती क्रिकेट सल्लागार समितीच्या एका सदस्याने दिली. माजी कर्णधार कपिल देव, अंशुमन गायकवाड आणि शांता रंगास्वामी यांचा समावेश असलेली क्रिकेट सल्लागार समिती नव्या प्रशिक्षकाची निवड करणार आहे.

परदेशी प्रशिक्षकाची निवड करण्यास आम्ही उत्सुक नाही. गॅरी कर्स्टन यांनीही या पदासाठी अर्ज केल्यामुळे प्रशिक्षक निवडताना कठीण जाणार आहे. परंतु, भारतीय व्यक्तीला आमचे प्राधान्य असेल. शिवाय, भारतीय संघाची कामगिरी चांगली झाली आहे. असे असताना मुख्य प्रशिक्षक बदलण्याचा विचार का करायचा, असा प्रश्न उपस्थित करत शास्त्री यांचा कार्यकाळ वाढवून त्यांच्याशी नवा करार केला जाईल, असे सदस्याने नमूद केले.

सद्य परिस्थितीत बदल करून नव्या व्यक्तीला संधी दिल्यास भारतीय संघाच्या रणनीतीमध्ये बदल होईल. हा बदल आगामी ५ वर्षांसाठी असेल. त्यामुळे सर्वांची इच्छा नसताना बदल करणे भारतीय संघावर अन्याय करणारे ठरेल, असे भारतीय क्रिकेट नियामक मंडळाच्या (बीसीसीआय) एका अधिकाऱ्याकडून सांगण्यात आले.

भारतीय संघाच्या मुख्य प्रशिक्षकपदाच्या निवडीसंदर्भात क्रिकेट सल्लागार समितीने घेतलेला निर्णय अंतिम असेल आणि बीसीसीआयला शिफारस करण्याची आवश्यकता भासणार नाही, असे क्रिकेट प्रशासक समितीचे प्रमुख विनोद राय यांनी स्पष्ट केले.