ICC रँकिंग: अश्विनचे स्थान घसरले, जडेजा अव्वल

मटा ऑनलाइन वृत्त। दुबई

भारताचा फिरकी गोलंदाज रविचंद्रन अश्विन आयसीसीच्या ताज्या कसोटी गोलंदाजांच्या रँकिंगमध्ये तिसऱ्या स्थानावर घसरला आहे. कोलंबोत झिम्बाब्वेविरुद्ध कसोटी सामन्यात ११ बळी घेणाऱ्या श्रीलंकेच्या रंगना हेराथने अश्विनला मागे सारत दुसऱ्या स्थानावर हक्क प्रस्थापित केला आहे. रविंद्र जडेजा मात्र ८९८ गुणांसह पहिल्या स्थानावर कायम आहे.

३९ वर्षीय हेराथ कसोटी क्रिकेटमध्ये सर्वात यशस्वी डावखुरा फिरकी गोलंदाज आहे. हेराथने ८१ सामन्यांमध्ये ३८४ बळी मिळवले आहेत. हेराथकडे ८६६ गुण आहेत. तो अश्विनच्या तुलनेत केवळ एका गुणाने पुढे आहे. इंग्लंडचा जेम्स अँडरसन आणि ऑस्ट्रेलियाचा जोश हेजलवुड संयुक्तपणे चौथ्या स्थानावर आहेत.

दक्षिण आफ्रिकेचा केशव महाराज १२ स्थानावरील बढतीसह २६व्या स्थानावर पोहोचला आहे. केशवने इंग्लंडविरुद्ध ट्रेंड ब्रिज कसोटीत ६ बळी घेत ३४० धावांच्या विजयात महत्त्वपूर्ण भूमिका पार पाडली. त्याच्या देशासाठी १९९२ नंतर एखाद्या फिरकी गोलंदाजाची ही चौथी सर्वश्रेष्ठ रँकिंग ठरली आहे.

कसोटीमधील फलंदाजांबाबत सांगायचे झाले तर, दक्षिण आफ्रिकेचा हाशिम अमला पुन्हा एकदा टॉप १० मध्ये आला आहे. तो ६ पायऱ्या वर चढत ७ व्या स्थानावर पोहोचला आहे. या यादीत ऑस्ट्रेलियाचा स्टीव्ह स्मिथ पहिल्या क्रमांकावर आहे. इंग्लंडचाच जो रूट दुसऱ्या, तर न्यूझीलंडचा के. विल्यम्स तिसऱ्या क्रमांकावर आहे. भारतीय फलंदाज चेतेश्वर पुजारा चौथ्या, तर विराट कोहली पाचव्या स्थानावर आहेत. या यादीत आणखी एक भारतीय फलंदाज लोकेश राहुल १०व्या स्थानावर आहे.