‘स्टम्प माइक’मुळे ‘दिल्ली’चा पंत वादात

नवी दिल्ली : भारताचा युवा यष्टिरक्षक रिषभ पंतच्या आवाजातील स्टम्प माइकमध्ये ध्वनीमुद्रित झालेल्या संभाषणाची 'क्लिप' सोशल मीडियावरून पसरल्याने तो वादाच्या भोवऱ्यात अडकला होता. तथापि, भारतीय क्रिकेट नियामक मंडळाने (बीसीसीआय) ही क्लिप मोडतोड करून बनवलेली असल्याचे स्पष्ट करून या वादावर पडदा टाकला आहे. आयपीएलमध्ये दिल्ली कॅपिटल्स संघाकडून खेळणारा पंत हा कोलकाता नाइट रायडर्सविरुद्धच्या सामन्यात यष्टिरक्षणादरम्यान गोलंदाज लमिचेने याने चेंडू टाकण्यापूर्वीच 'हा तर चौकार आहे', असे म्हणताना आढळतो. या वेळी कोलकात्याचा रॉबिन उथप्पा फलंदाजी करत होता. त्याच्या पुढच्या चेंडूवर उथप्पाने चौकार मारल्याचे क्लिपमध्ये दिसत असून, त्यावरून पंतच्या संभाषणाविषयी शंका उपस्थित करण्यात आली.