सचिनच्या संघात धोनी नाही

विक्रमवीराने निवडला आपला वर्ल्डकप संघ

दृष्टिक्षेप

१)सचिन तेंडुलकरच्या वर्ल्डकप संघाचे नेतृत्व न्यूझीलंडचा कर्णधार केन विल्यमसनकडे आहे.

२)सचिनच्या वर्ल्डकप संघात एकूण पाच भारतीय आहेत. ते असेः रोहित शर्मा, विराट कोहली, हार्दिक पंड्या, रवींद्र जाडेजा आणि जसप्रीत बुमराह.

३)सचिनच्या संघात तीन तज्ज्ञ तेज गोलंदाज आहेत. ज्यात स्टार्क, आर्चर आणि बुमराह यांचा समावेश आहे.

वृत्तसंस्था, नवी दिल्ली

सध्या क्रिकेटप्रेमींसह जाणकार, आजी-माजी खेळाडूंमध्ये आपला आवडता संघ निवडण्याचा ट्रेंड आहे. गेल्या रविवारीच पार पडलेल्या वर्ल्डकपनंतर अनेकांनी आपले प्लेईंग इलेव्हन जाहीर केले असून भारताचा विक्रमवीर कसोटीपटू सचिन तेंडुलकरही त्याला अपवाद नाही. मात्र सचिनने निवडलेल्या वर्ल्डकप संघात महेंद्रसिंग धोनीचा समावेश नाही.

सचिनच्या वर्ल्डकप संघाचे नेतृत्व न्यूझीलंडचा प्रेरणादायी कर्णधार केन विल्यमसनकडे आहे. या संघात पाच भारतीयांचा समावेश आहे ज्यात अर्थातच सलामीवीर रोहित शर्मा, विराट कोहली, हार्दिक पंड्या, रवींद्र जाडेजा आणि जसप्रीत बुमराह यांचा समावेश आहे. रोहित आणि जॉनी बेअरस्टो सलामीवीराची भूमिका पार पाडतील, तर विल्यमसन तिसऱ्या क्रमांकावर फलंदाजीस येईल. विराट कोहलीला फलंदाजीत चौथा क्रमांक आहे. त्यानंतर अष्टपैलू शकीब अल हसन, बेन स्टोक्स, हार्दिक पंड्या आणि रवींद्र जाडेजा यांचा क्रमांक असेल. त्याआधी आयसीसीनेही आपला वर्ल्डकप संघ जाहीर केला होता ज्यात रोहित शर्मा आणि जसप्रीत बुमराह या दोनच भारतीयांचा समावेश होता.

सचिन तेंडुलकरचा वर्ल्डकप २०१९ संघ

रोहित शर्मा, जॉनी बेअरस्टो (यष्टीरक्षक), केन विल्यमसन (कर्णधार), विराट कोहली, शकीब अल हसन, बेन स्टोक्स, हार्दिक पंड्या, रवींद्र जाडेजा, मिचेल स्टार्क, जोफ्रा आर्चर, जसप्रीत बुमराह.