विराटच्या समर्थनात उतरला गांगुली

मटा ऑनलाइन वृत्त । कोलकाता

टीम इंडियाचा कर्णधार विराट कोहलीने क्रिकेटच्या व्यस्त कार्यक्रमावर केलेल्या टीकेला माजी कर्णधार सौरव गांगुलीने पाठिंबा दर्शवला आहे. टीम इंडियाला दक्षिण आफ्रिकेसारख्या आव्हानात्मक दौऱ्याच्या तयारीसाठी पुरेशा वेळेची आवश्यकता होती असे गांगुलीने म्हटले.

क्रिकेटच्या व्यस्त कार्यक्रमामुळे दक्षिण आफ्रिकेसारख्या आव्हानात्मक दौऱ्याच्या तयारीसाठी पुरेसा वेळ मिळाला नसल्याची तक्रार विराट कोहलीने केली होती. त्यानंतर बीसीसीआयने विराटच्या तक्रारीवर गंभीरपणे विचार करणार असल्याचे स्पष्ट केले होते.

कोहलीचे समर्थन करताना गांगुलीने म्हटले की, क्रिकेटच्या वेळापत्रकाला घेऊन विराटने व्यक्त केलेले मत योग्यच आहे. तुम्ही जर दक्षिण आफ्रिकेसारख्या आव्हानात्मक दौऱ्यावर जाणार असाल तर टीमला तयारीसाठी पुरेसा वेळ दिला पाहिजे. एका कार्यक्रमात सौरव गांगुली सहभागी झाली होता. त्यावेळी सौरव गांगुलीने विराटच्या शतकी खेळीचे कौतुक केले. विराट कोहली सचिन तेंडुलकरच्या वन-डे सामन्यातील ४९ शतकांचा विक्रम मोडू शकतो. मात्र, कसोटीतील ५१ शतकांचा विक्रम मोडणे कोहलीसाठी आव्हानात्मक असणार आहे. सध्या विराट २९ वर्षांचा असून त्याला फिटनेस राखावा लागणार आहे. विराटने ९ वर्षाच्या कारकीर्दीत ३० शतक झळकावले असून वाढत्या वयानुसार मोठी इनिंग खेळणे, शतक करणे त्याला कठीण होणार असल्याचे गांगुलीने म्हटले. माझ्यासह, सचिन तेंडुलकरलादेखील वाढत्या वयात शतक करणे कठीण झाले होते, याकडेही सौरव गांगुलीने लक्ष वेधले.