म. टा. प्रतिनिधी, औरंगाबाद
पालिकेतर्फे आयोजित अखिल भारतीय दिव्यांग टी-२० क्रिकेट स्पर्धेत यजमान महाराष्ट्र संघाने विजयी आगेकूच कायम ठेवली. तेलंगणा, आंध्र प्रदेश या संघांनीही विजय नोंदवले.
यजमान महाराष्ट्र संघाने केरळ संघाचा ५९ धावांनी पराभव करुन स्पर्धेतील सलग दुसरा विजय साकारला. प्रथम फलंदाजी करताना महाराष्ट्र संघाने २० षटकात पाच बाद १६५ धावा काढल्या. यात ज्योतीराम घुले (४५), अभिलाष लोखंडे (३७) यांनी डावास आकार दिला. विनू नारायणने प्रभावी गोलंदाजी करताना ३० धावांत पाच विकेट्स घेतल्या.
केरळ संघाने २० षटकात आठ बाद १०६ धावा काढल्या. त्यात रईसचा (३०) अपवाद वगळता अन्य फलंदाज झटपट बाद झाले. अभिलाष लोखंडेने १४ धावांत तीन गडी टिपत अष्टपैलू कामगिरी बजावली.
दुसऱ्या सामन्यात तेलंगणा संघाने पाँडेचेरी संघावर सहा विकेट्स राखून सहज विजय साकारला. तिसऱ्या लढतीत आंध्र प्रदेश संघाने गुजरात संघावर ४८ धावांनी विजय नोंदवला. यात वसंत कुमारने ७६ धावा व ३९ धावांत चार विकेट्स घेत सामना गाजवला.
संक्षिप्त स्कोअरबोर्ड : १) महाराष्ट्र संघ : २० षटकात सर्वबाद १६५ (ज्योतीराम घुले ४५, अभिलाष लोखंडे ३७, जुनेद नेहरी १४, सय्यद मुजाहेद १९, दीपक जावळे १६, इतर १७, विनू नारायण ५-३०, करीम २-२८, अजमल, रियास प्रत्येकी एक विकेट) विजयी विरुद्ध केरळ संघ : २० षटकात आठ बाद १०६ (रईस ३०, करीम १३, अब्दुल अली १२, रियास नाबाद १५, अभिलाष लोखंडे ३-१४, सय्यद मुजाहेद २-१४, बाबा पवार, दीपक जावळे, करण राजपूत प्रत्येकी एक विकेट). सामनावीर : अभिलाष लोखंडे.
२) पाँडेचेरी संघ : १७.५ षटकात सर्वबाद १०७ (सरवाना २१, कार्थी १४, पूर्वासन १४, सेल्वा कुमार १०, इतर २४, महादवन २-२०, वसाराम २-२३, निखिल २-१४, नरहरी २-४, अखिल, राजेश कुमार प्रत्येकी एक विकेट) पराभूत विरुद्ध तेलंगणा संघ : १६ षटकात चार बाद १०८ (नरहरी ३२, अखिल नाबाद २५, उदय ११, इरफान नाबाद ११, निखिल १५, अरुण गिरी २-१८, कार्थी, कानी प्रत्येकी एक विकेट). सामनावीर : नरहरी.
३) आंध्र प्रदेश संघ : २० षटकात पाच बाद २०८ (वसंत कुमार ७६, के. एस. रेड्डी ५३, व्ही. सी. एम. रेड्डी १८, पी. राजू १३, सुरेंद्र १२, इतर ३२, सुमित सिंग २-३२, याहा पटेल, राजू राठोड प्रत्येकी एक विकेट) विजयी विरुद्ध गुजरात संघ : २० षटकात आठ बाद १६० (याहा पटेल २१, राजू राठोड २८, सुमित सिंग १६, हार्दिक राणा २५, एम. तांडेल नाबाद २५, इतर ३०, वसंत कुमार ४-३९, पी. राजू २-१८, सुरेंद्र, अखिल रेड्डी प्रत्येकी एक विकेट). सामनावीर : वसंत कुमार.