सिग्नल टेलिकॉम संघ चॅम्पियन

म. टा. क्रीडा प्रतिनिधी, नागपूर

मध्य रेल्वेच्या आंतरविभाग क्रिकेट स्पर्धेचे विजेतेपद सिग्नल अॅण्ड टेलिकॉम (एस अॅण्ड टी) संघाने पटकावले. स्पर्धेच्या अंतिम लढतीत संघाने मेकॅनिकल संघाला चार गड्यांनी पराभूत केले.

मध्य रेल्वेच्या अजनी मैदानावर झालेल्या लढतीत मेकॅनिकल विभागाने नाणेफेक जिंकत प्रथम फलंदाजीचा निर्णय घेतला. मात्र, मेकॅनिकल संघाला निर्धारित २० षटकांत १३८ धावांपर्यंतच मजल मारता आली. यात कुणालने पाच चौकारांच्या साहाय्याने सर्वाधिक ३० धावा केल्या. तर इमरान खानने २२ आणि सतीश ठाकूरने १८ धावांचे योगदान दिले. एस अॅण्ड टी संघाकडून दिनेश सूर्यवंशीने १४ धावा देत २, तर राहुल जाधव, अभिषेक नायडू यांनी प्रत्येकी एक गडी बाद केला. प्रत्युत्तरात सिग्नल अॅण्ड टेलिकॉम संघाने चांगली सुरुवात केली. मात्र, मधल्या काळात मेकॅनिकल संघाच्या गोलंदाजांनी एस अॅण्ड टी संघाच्या फलंदाजांना बांधून ठेवले. मात्र, ओम गुप्ताच्या ३०, नितीन अहिररावच्या २९ आणि विक्रम वर्माच्या नाबाद २८ धावांच्या जोरावर एस अॅण्ड टी संघाने २० षटकांतील पाचव्या चेंडूवर विजयी धावा करत चार गड्यांनी विजय मिळवत विजेतेपदावर नाव कोरले. मेकॅनिकल संघाकडून कुणाल कडूने सर्वाधिक तीन गडी बाद केले, तर रामेंद्र मानतेने दोन गडी बाद करण्याची कामगिरी केली. मात्र, ही कामगिरी संघाला विजय मिळवून देण्यात पुरेशी ठरली आहे.

एस अॅण्ड टी संघाचा विक्रम वर्मा सामनावीर ठरला, तर टीआरएसचा फिरोझ खान सर्वोत्तम फलंदाज, आरपीएफचा अर्जून समांत्रे उत्कृष्ट गोलंदाज, मेकॅनिकलचा इमरान खान सर्वोत्कृष्ट अष्टपैलू खेळाडू आणि एस अॅण्ड टीचा राहुल जाधव स्पर्धेतील सर्वोत्तम खेळाडू ठरला.