बेंगळुरूः वेगवान गोलंदाज महम्मद सिराजने दोन्ही डावांत मिळून घेतलेल्या दहा विकेटच्या जोरावर भारत 'अ' संघाने मालिकेतील पहिल्या अनौपचारिक कसोटी क्रिकेट सामन्यात दक्षिण आफ्रिका 'अ' संघावर एक डाव ३० धावांनी विजय मिळवला. भारताने पहिल्या डावात ३३८ धावांची आघाडी घेतल्यानंतर फलंदाजीस उतरलेल्या दक्षिण आफ्रिकेच्या संघाची सोमवारी तिसऱ्या दिवसअखेर दुसऱ्या डावात ४ बाद ९९ अशी अवस्था झाली होती. मंगळवारी सुरुवातीलाच झुबेर हमझा बाद झाल्यानंतर आफ्रिकेचा निम्मा संघ १२१ धावांत माघारी परतला होता. तथापि, रुडी सेकंड आणि एस. वोन बर्ग यांनी चिवट लढत देत भारताचा विजय लांबवला. या दोघांनी सहाव्या विकेटसाठी ११९ धावांची भागीदारी केली. गुरबानीने बर्गला बाद करून ही जोडी फोडली. बर्गने १७५ चेंडूंमध्ये ६ चौकारांसह ५० धावा केल्या. त्यानंतर, सेकंडला तळातील फलंदाजांकडून पूरक साथ मिळाली नाही. चहलने सेकंडला बाद करून भारताच्या विजयातील अडसर दूर केला. २१४ चेंडूंमध्ये १५ चौकारांसह ९४ धावा करणाऱ्या सेकंडचे शतक सलग दुसऱ्या डावात ६ धावांनी हुकले. पहिल्या डावातही सेकंड ९४ धावांवर बाद झाला होता. या दोन्ही संघांतील दुसरा सामना १० ऑगस्टपासून बेंगळुरू येथे सुरू होणार आहे.
स्कोअरबोर्ड : भारत अ ८ बाद ५८४ डाव सोडला विजयी वि. दक्षिण आफ्रिका अ २४६ आणि १२८.५ षटकांत ३०८ (रुडी सेकंड ९४, शॉन वॉन बर्ग ५०, महम्मद सिराज ५-७३).
स्कोअरबोर्ड : भारत अ ८ बाद ५८४ डाव सोडला विजयी वि. दक्षिण आफ्रिका अ २४६ आणि १२८.५ षटकांत ३०८ (रुडी सेकंड ९४, शॉन वॉन बर्ग ५०, महम्मद सिराज ५-७३).