वर्ल्ड कप: जायबंदी धवनच्या जागी ऋषभ पंत?

मुंबई:

विश्वचषक स्पर्धेत हाताला झालेल्या दुखापतीमुळे संघाबाहेर जावे लागलेल्या भारताच्या सलामीवीर शिखर धवनची जागा ऋषभ पंत घेण्याची दाट शक्यता आहे. वर्ल्ड कपचा संघ निवडण्यापूर्वी भारतीय संघात ऋषभ पंतची निवड पक्की मानली जात होती, पण त्याच्याऐवजी निवड समितीने दिनेश कार्तिकला घेतले. मात्र सूत्रांच्या माहितीनुसार, धवन जायबंदी झाल्यानंतर पंतला संघात घेणे जवळपास नक्की ठरल्याचे बोलले जात आहे.

ऑस्ट्रेलियाविरुद्धच्या सामन्यात नाथन कुल्टरचा एक उसळता चेंडू शिखर धवनच्या हातावर आदळला होता. त्यामुळं त्याच्या अंगठ्याला मार लागला. त्याची पर्वा न करता त्या सामन्यात शिखरनं धडाकेबाज शतक ठोकलं. मात्र, क्षेत्ररक्षणासाठी तो मैदानात उतरू शकला नाही. त्याच्याऐवजी रवींद्र जाडेजानं क्षेत्ररक्षण केलं. सामन्यानंतर केलेल्या वैद्यकीय तपासणीत त्याच्या अंगठ्याला फ्रॅक्चर झाल्याचं समोर आलं. धवनला तीन आठवड्यांची विश्रांती देण्यात आली आहे.

धवनच्या दुखापतीचा संपूर्ण अहवाल भारतीय संघ व्यवस्थापन भारतीय वेळेनुसार सायंकाळी ६.३० पर्यंत ICC टेक्निकल टीमला सोपवणार आहे. त्यानंतर धवनच्या रिप्लेसमेंटची मागणी करण्यात येईल. धवन २ जुलैला बांगलादेशविरुद्ध होणाऱ्या सामन्यापर्यंत उपलब्ध नसेल. शिखर धवनची जागा ऋषभ पंत घेईल, अशी सूत्रांची माहिती आहे.

राष्ट्रीय निवडसमितीने वर्ल्डकपसाठी निवडलेल्या पहिल्या १५ जणांच्या भारतीय संघात ऋषभची निवड केली नव्हती. अनुभवाच्या बाबतीत पंत कार्तिकपेक्षा मागे पडला. पण आता आक्रमक फलंदाज धवन जायबंदी झाल्यानंतर पंत संघात यावा यासाठी व्यवस्थापन प्रयत्न करत आहे. पंत कदाचित येत्या ४८ तासांतच लंडनला रवाना होईल.