३४ वर्षांत प्रथमच
ऑस्ट्रेलियाची घसरण
मेलबर्न : ऑस्ट्रेलिया क्रिकेट संघाची आयसीसी क्रमवारीत सहाव्या स्थानावर घसरण झाली आहे. मागील ३४ वर्षांत प्रथमच ऑस्ट्रेलियाचे क्रमवारीतील स्थान एवढ्या खालच्या क्रमांकावर आले आहे. ऑस्ट्रेलियाला इंग्लंडविरुद्धच्या पाच सामन्यांच्या मालिकेतील पहिल्या दोन लढतींत पराभव पत्करावा लागला. वन-डे क्रमवारीत इंग्लंड अव्वल, भारत दुसऱ्या, द. आफ्रिका तिसऱ्या स्थानावर आहे. न्यूझीलंडचा संघ चौथ्या, तर पाकिस्तानचा संघ पाचव्या स्थानावर आहे.
...
धवनच्या २४व्या स्थानी
दुबई : भारताचा सलामीवीर शिखर धवनला आयसीसी क्रमवारीत १० स्थानांचा फायदा झाला आहे. नव्या फलंदाजीच्या क्रमवारीनुसार तो २४व्या स्थानावर पोहोचला आहे. कारकिर्दीतील हे त्याचे सर्वोत्तम स्थान आहे. मुरली विजय २३व्या स्थानावर पोहोचला आहे. स्टीव्ह स्मिथ अजूनही अव्वल स्थानावर असून, विराट कोहली दुसऱ्या स्थानी आहे. चेतेश्वर पुजारा सहाव्या स्थानावर आहे. लोकेश राहुल आणि अजिंक्य रहाणे अनुक्रमे १८ आणि १९व्या स्थानावर आहे. गोलंदाजांच्या क्रमवारीत रवींद्र जडेजा तिसऱ्या आणि रविचंद्रन अश्विन पाचव्या स्थानावर आहे.
..
कसोटी अनिर्णित
ग्रोस इस्लेट : चेंडू कुरतडण्याच्या प्रकरणी वादग्रस्त ठरलेला श्रीलंका आणि वेस्ट इंडिजदरम्यानच्या मालिकेतील दुसरा कसोटी क्रिकेट सामना अनिर्णित राहिला. तीन सामन्यांच्या मालिकेत विंडीज संघ १-०ने आघाडीवर आहे. संक्षिप्त धावफलक : श्रीलंका : पहिला डाव - २५३ आणि दुसरा डाव - ३४२ अनिर्णित वि. वेस्ट इंडिज : पहिला डाव - ३०० आणि दुसरा डाव - ६०.३ षटकांत ५ बाद १४७ (ब्रेथवेट ५९, होप ३९, लकमल २-४८, रजिता २-२३, धनंजय १-३३).
...
रामकुमार 'आउट'
नवी दिल्ली : भारताच्या रामकुमार रामनाथनचा ग्रास कोर्टवरील संघर्ष सुरूच आहे. त्याला एटीपी चॅलेंजर टेनिस स्पर्धेतील पहिल्याच फेरीत पराभव पत्करावा लागला. ऑस्ट्रियाच्या सेबॅस्टियन ऑफनेरने रामकुमार रामनाथनचा ७-५, ६-३ असा पराभव केला. ही लढत ६४ मिनिटे चालली. रामकुमारला ग्रास कोर्टवरील मागील तिन्ही स्पर्धांमध्ये केवळ तीनच विजय मिळवता आले आहेत. जागतिक क्रमवारीत १२५व्या स्थानावर असणाऱ्या रामकुमारला १३२० युरोचे पारितोषिक मिळाले. दुहेरीत भारताचे चार टेनिसपटू सहभागी झाले आहेत.
...
मुस्तफीझूरला दुखापत
ढाका : बांगलादेशचा वेगवान गोलंदाज मुस्तफीझूर रहमानला दुखापत झाली आहे. त्यामुळे वेस्ट इंडिजविरुद्धच्या कसोटी मालिकेसाठी त्याचा बांगलादेशविरुद्धच्या संघात समावेश करण्यात आलेला नाही. २२ वर्षीय मुस्तफीझूरने १० कसोटींत २६ विकेट घेतल्या आहेत. आयपीएल स्पर्धेत मुंबई इंडियन्सकडून खेळताना त्याच्या डाव्या पायाच्या अंगठ्याला दुखापत झाली आहे.
...