जडेजा-अश्विनची कमाल; न्यूझीलंडचा 'खेळ खल्लास'

मटा ऑनलाइन वृत्त । कानपूर

टीम इंडियाच्या फिरकीपटूंना एकदा का सूर सापडला की ते प्रतिस्पर्ध्यांची कशी गिरकी घेतात, हे आज कानपूर कसोटीच्या तिसऱ्या दिवशी पाहायला मिळालं. १ बाद १५९ अशा सुस्थितीत असलेले किवी भारतीय गोलंदाजांचा घाम काढणार, असं वाटत असतानाच रवींद्र जडेजा आणि आर. अश्विनच्या फिरकीनं कमाल केली आणि न्यूझीलंडचं आघाडी घेण्याचं स्वप्न धुळीस मिळवलं.

रवींद्र जडेजाने ३४ षटकांत ७३ धावांच्या बदल्यात न्यूझीलंडचा अर्धा संघ तंबूत धाडला, तर अश्विननं 'सेट' झालेल्या चार फलंदाजांना बाद करून लौकिकाला साजेशी कामगिरी केली.

कानपूर कसोटीचे लाइव्ह स्कोअरकार्ड



कानपूर कसोटीच्या दुसऱ्या दिवशी चहापानानंतरचा खेळ पावसामुळे होऊ शकला नव्हता. पण, ४७ षटकांत न्यूझीलंडच्या फलंदाजांनी भारताच्या गोलंदाजांवर वर्चस्व गाजवलं होतं. सलामीवीर मार्टिन गप्टिल बाद झाल्यानंतर, टॉम लॅथम आणि कर्णधार केन विल्यमसन यांची जोडी झक्कास जमली होती. शतकी भागीदारी रचणाऱ्या या दोघांना आज अश्विननं पाठोपाठ बाद केलं, तर रॉस टेलरचा अडथळा जडेजानं दूर केला. या तीन धक्क्यांतून संघाला सावरण्याचा प्रयत्न ल्यूक राँची आणि मिचेल सॅन्टनरने केला. त्यांनी संथ खेळ करत पीचवर टिकाव धरला, पण अश्विन-जडेजानं त्यांनाही चकवलं. त्यानंतर पाहुण्याचं शेपूट अगदीच निष्प्रभ ठरलं. एकट्या जडेजानंच त्यांना लपेटलं. २६२ धावांवर न्यूझीलंडचा डाव आटोपला आणि भारतानं पहिल्या डावात ५६ धावांची आघाडी घेतली. त्यामुळे आता सामन्याचं पारडं भारताकडे झुकलं आहे.