श्रीशांतचे विनोद राय यांना साकडे

मुंबई : भारतीय क्रिकेट बोर्डाचा कारभार आता प्रशासकीय समितीकडे आल्यानंतर त्यांच्याकडे आपल्यावरील अन्यायाची दाद मागण्याचे भारताकडून खेळलेला वेगवान गोलंदाज एस. श्रीशांतने ठरविले आहे. विनोद राय यांच्या नेतृत्वाखालील प्रशासकीय समिती सध्या बीसीसीआयचे कामकाज पाहते. आपल्या कारकीर्दीतील चार वर्षे निष्कारण वाया गेली आणि अजूनही आपल्याला क्रिकेट खेळू दिले जात नसल्याबद्दल श्रीशांत ही दाद मागणार आहे. आयपीएलच्या सहाव्या अध्यायात स्पॉटफिक्सिंगचे आरोप झाल्यामुळे भारतीय क्रिकेट बोर्डाकडून कायमची बंदी घालण्यात आलेल्या एस. श्रीशांतने क्रीडा लवादाकडेही न्याय मागण्याची तयारी ठेवली आहे.

श्रीशांतवरील आरोपातून दिल्ली न्यायालयाने २०१५मध्ये त्याची मुक्तता केली होती. पण तरीही बीसीसीआयकडून आपल्याला खेळण्याची परवानगी देण्यात येत नाही, असे श्रीशांतचे म्हणणे आहे.

श्रीशांत सध्या स्कॉटलंड येथे ग्लेनरोथ्स क्रिकेट क्लबतर्फे क्रिकेट खेळत आहे. एडी गिब्ल यांनी त्याला तेथे खेळण्यास आमंत्रित केले होते. ते म्हणाले की, क्रीडा लवादाकडे दाद मागण्याचा पर्याय श्रीशांतकडे खुला आहे. प्रख्यात वकील हार्पर मॅकलिओड यांच्याशी यासंदर्भात बोलणी सुरू असल्याचेही गिब्स म्हणाले.