स्मिथची टीम इंडियाला बियरची ऑफर

मटा ऑनलाइन वृत्त । धरमशाला

ऑस्ट्रेलियाचा कर्णधार स्टिव्ह स्मिथला टीम इंडियाबरोबर पुन्हा मैत्री करायची आहे. त्यामुळेच चार सामन्यांची कसोटी मालिका संपताच तो इंडियाचा धरमशाला कसोटीचा कर्णधार अजिंक्य राहणे आणि टीम इंडियातील इतर खेळाडूंकडे गेला आणि त्यांना थेट बियरची ऑफर केली.

कसोटी मालिकेत टीम इंडिया आणि ऑस्ट्रेलिया संघादरम्यान बराच विसंवाद निर्माण झाला होता. आता मालिकाच संपल्याने, झालेगेले विसरून जाण्यासाठी स्मिथने रहाणे आणि टीमला बियरची ऑफर केली आहे. कसोटी मालिकेदरम्यान भावनांवर नियंत्रण ठेवता आले नाही म्हणून स्मिथने भारतीय संघाची माफीसुद्धा मागितली आणि रहाणेशी संवादही साधला. 'मी रहाणेला भेटलो. आम्ही तुझ्यासोबत ड्रिंक घ्यायला येऊ शकतो का? असे मी त्याला विचारले. त्यासाठी पुढच्या आठवड्यात भेटायचंही ठरवलं,' असं स्मिथ म्हणाला. 'रहाणेशी माझे चांगले संबंध आहेत. तो आयपीएलमधील माझा सहकारी खेळाडू आहे. पुढच्या आठवड्यात आयपीएलमध्ये मी त्याच्यासोबत असेल,' असेही स्मिथ याने स्पष्ट केलं.

कसोटी मालिकेदरम्यान भारतीय संघाने दाखवलेल्या सतर्कता आणि आक्रमकतेचं स्मिथनं कौतुकही केलं. टीम इंडियानं संधी मिळताच आक्रमकता दाखवली. तर कधी बचावात्मक पवित्रा घेत खेळ केला. भारतीय खेळपट्टीवर परिस्थितीनुसार खेळ खेळायला हवा, हे मी यातून शिकलो आहे, असं स्मिथ म्हणाला.

ऑस्ट्रेलियाच्या दुसऱ्या डावात मुरली विजयने एक टप्पा पडलेला झेल योग्य ठरवला होता. त्यावर स्मिथने कठोर शब्दांत टीका केली होती. त्यानंतर त्याने त्यावर दिलगिरीही व्यक्त केली होती. या प्रकाराबद्दल त्याने रहाणेला भेटून पुन्हा माफी मागितली.