धोनीनं रांचीत न्यूझीलंडला 'असा' दिला 'धक्का'

मटा ऑनलाइन वृत्त । रांची

भारत दौऱ्यावर पराभवाचे धक्के सहन करणाऱ्या न्यूझीलंडच्या शिलेदारांना महेंद्रसिंग धोनीनं आपल्या गावात - रांचीमध्ये आश्चर्याचा जबरदस्त 'धक्का' दिला. न्यूझीलंड संघाच्या बसच्या शेजारी धोनीची आलिशान 'हमर' अवरतली, तेव्हा अनेक किवी खेळाडूंचे डोळे विस्फारले, तोंडाचा चंबूच झाला. त्यांचे हे भाव, त्यांची 'तोंडं' अनेक कॅमेऱ्यांनी टिपली.

भारत-न्यूझीलंड यांच्यातील पाच वनडे सामन्यांच्या मालिकेतील चौथा सामना आज रांचीमध्ये होत आहे. या सामन्यासाठी दोन्ही संघ मंगळवारी रांचीमध्ये पोहोचले. त्यावेळी बिरसा मुंडा एअरपोर्टवर दोन्ही संघाच्या शिलेदारांचं दणक्यात स्वागत झालं. या प्रेमानं किवी संघ भारावून गेला होताच, पण त्यानंतर त्यांनी जे पाहिलं ते भलतंच विस्मयकारक होतं.

संघसहकाऱ्यांसोबत हॉटेलवर जाण्याआधी घरी जाऊन कुटुंबीयाना भेटून यायचं कॅप्टन कूल धोनीनं ठरवलं होतं. त्यामुळे टीम इंडियाच्या बसमधून न जाता, त्यानं आपली कार मागवली होती. ही कार दुसरी-तिसरी कुठली नाही, तर 'हमर एच2' होती. एअरपोर्टबाहेर न्यूझीलंड संघाची बस उभी होती, त्याशेजारीच हमर उभी राहिली, तेव्हा तिची शान आणि धोनीचा रुबाब पाहून टॉम लॅथम, रॉस टेलर यांच्या मनात लाडूच फुटला.

महेंद्रसिंग धोनीचं बाईक आणि कारवरचं प्रेम सर्वश्रुतच आहे. त्यानं २००९ मध्ये 'हमर' खरेदी केली, तेव्हाही बराच गाजावाजा झाला होता. या कारची किंमत दीड कोटी रुपये आहे. पण, या कारसारख्या अनेक शाही गाड्या धोनीच्या बंगल्यात थाटात उभ्या आहेत. त्यात महिंद्रा स्कॉर्पिओ ओपन (११ लाख), लँड रोव्हर फ्रीलँडर (५२ लाख), जीएमसी सिएरा (४८ लाख), मित्सुबिशी पजेरो एसएफएक्स (२२ लाख), ऑडी क्यू-७ (७७ लाख), पोर्शे 911 (२.६ कोटी), फेरारी 599 (१.५ कोटी) यांचा समावेश आहे. म्हणजेच, 'हमर' पाहून अवाक झालेले किवी शिलेदार धोनीच्या घरी गेले, तर चक्कर येऊन पडल्याशिवाय राहणार नाहीत, नाही का?