दुसऱ्या विजयासह विदर्भाची आगेकूच
-सय्यद मुश्ताक अली क्रिकेट स्पर्धा
म.टा. क्रीडा प्रतिनिधी, नागपूर
उत्कृष्ट गोलंदाजी व फलंदाजीच्या जोरावर विदर्भ संघाने सय्यद मुश्ताक अली ट्वेंटी-२० क्रिकेट स्पर्धेतील विजयी मालिका कायम ठेवत बिहार संघावर सात गड्यांनी मात केली. त्यामुळे दोन लढतीत दोन विजयांसह विदर्भाचे आठ गुण झाले असून संघ बी गटात अव्वल स्थानावर आहे.
सूरत येथे सुरु असलेल्या स्पर्धेत विदर्भ संघाचा नियमित कर्णधार फैज फजलच्या अनुपस्थितीत जबाबदारी सांभाळणाऱ्या गणेश सतीशने नाणेफेक जिंकत प्रथम गोलंदाजी करत बिहार संघाचा डाव २० षटकात ८ बाद १०३ धावांवर रोखण्यात यश मिळवला. विदर्भाने प्रत्युत्तरात शलभ श्रीवास्तव व रवी जांगीड यांच्या उत्तम फलंदाजीच्या जोरावर केवळ १४.२ षटकातच या लक्ष्याचा पाठलाग करत दुसरा विजय मिळवला. बिहारचा डाव कमी धावसंख्येत रोखल्यानंतर विदर्भ एक सहज विजय मिळवेल याची आशा होती. दरम्यान विदर्भाची सुरुवात निराशाजनक झाली. पहिल्या लढतीत धडाकेबाज सुरुवात करणाऱ्या अथर्व तायडे व जितेश शर्मा यांना फारशी चांगली सुरुवात करता आली नाही. जितेश शर्मा (१) धाव काढून तंबूत परतला. तर अथर्व तायडे (१५) धावांवर बाद झाला. दोघांनाही बिहारचा गोलंदाज विवेकने त्रिफळाचित केले. त्यामुळे २ बाद २८ अशा स्थितीतून शलभ श्रीवास्तव व गणेश सतीशने जबाबदारी सांभाळली. दरम्यान सतीश (६) धावांवर बाद झाला व विदर्भ ३ बाद ४३ अशी अवस्था होती. मात्र, शलभ व रवी जांगीड यांनी संयमी फलंदाजी करत ६० धावांची भागीदारी करत लक्ष्याचा यशस्वी पाठलाग करत सात गड्यांनी संघाला विजय मिळवून दिला. शलभ श्रीवास्तवने ३८ चेंडूत नाबाद ४९ धावा केल्या. यात सहा चौकारांचा समावेश होता. तर रवी जांगीडने पहिल्या लढतीप्रमाणेच दुसऱ्या लढतीतही १९ चेंडूत एक चौकार व एका षटकारासह नाबाद २७ धावा करत संघाच्या विजयात महत्वाची भूमिका बजावली. बिहार संघाकडून विवेकने दोन गडी बाद केले.
त्यापूर्वी विदर्भाच्या गोलंदाजांनी सुरुवातीपासूनच बिहारच्या फलंदाजांना बांधून ठेवले. त्यामुळे संघाला आक्रमक सुरुवात करता आली नाही. विदर्भाच्या गोलंदाजांनी सुरुवातीपासून निर्माण केलेले वर्चस्व शेवटपर्यंत कायम ठेवत बिहार संघाचा डाव २० षटकात ८ बाद १०३ धावांवरच रोखला. बिहारकडून बाबूल कुमारने सर्वाधिक २७ धावा केल्या. तर रहमत उल्लाहने १८ धावा केल्या. विदर्भाकडून यश ठाकूरने तीन षटके टाकत १२ धावांच्या मोबदल्यात दोन, तर अक्षय कर्णेवारने १७ धावांच्या मोबदल्यात दोन गडी बाद केले.
संक्षिप्त धावफलक
बिहार- २० षटकात ८ बाद १०३ (बाबूल कुमार २७, रहमत उल्लाह १८, केशव कुमार १२) गोलंदाजी- यश ठाकूर २/१२, अक्षय कर्णेवार २/१७
विदर्भ- १४.२ षटकात ३ बाद १०४ (शलभ श्रीवास्तव नाबाद ४९, रवी जांगीड नाबाद २७, अथर्व तायडे १५) गोलंदाजी- विवेक २/२७, प्रशांतकुमार सिंग १/१५
--------------------------------